‘এয়া হ’বই নোৱাৰে...’ ড্ৰাগছ কাণ্ডত পুত্ৰৰ গ্ৰেপ্তাৰৰ পাছতে অস্থিৰ শক্তি কাপুৰ

ডিজিটেল ডেস্ক : শ্বাহৰুখ তনয় আৰিয়ানৰ ড্ৰাগছ কাণ্ডক লৈ দেশজুৰি তীব্ৰ প্ৰতিক্ৰিয়া সৃষ্টি হোৱাৰ পাছত পুনৰ অনুৰূপ ঘটনা ঘটিছে। আৰিয়ানে ড্ৰাগছৰ গোচৰৰ পৰা দোমমুক্ত হোৱাৰ পাছত এই সম্পৰ্কীয় ঘটনাৰ পুনৰাবৃত্তি নহ’ব বুলি ধাৰণা কৰা হৈছিল যদিও পুনৰ ড্ৰাগছ কাণ্ডই তোলপাৰ লগাইছে বলীউডক। এইবাৰ ড্ৰাগছ কাণ্ডৰে সাঙোৰ খাইছে শক্তি কাপুৰৰ পুত্ৰ, অভিনেত্ৰী শ্ৰদ্ধা কাপুৰৰ জ্যেষ্ঠ ভাতৃ সিদ্ধান্ত কাপুৰৰ নাম। দেওবাৰে বেংগালুৰুৰ এখন বিলাসী হোটেলত অনুষ্ঠিত এটা ৰেভ পাৰ্টীৰ সময়ত সিদ্ধান্ত আৰক্ষীৰ জালত পৰিছে। সিদ্ধান্তক তাৰ পৰা গ্ৰেপ্তাৰ কৰে আৰক্ষীয়ে। আৰক্ষীৰ সূত্ৰ অনুসৰি, স্বস্থ্য পৰীক্ষাৰ সময়ত সিদ্ধান্তৰ শৰীৰত ড্ৰাগছৰ উপস্থিতি পোৱা গৈছিল।
 
দেওবাৰে নিশা পাৰ্ক হোটেলৰ পাবত চলিছিল এই ড্ৰাগছ পাৰ্টী। সেই পাৰ্টীত সিদ্ধান্ত কাপুৰক ডিজে হিচাপে প্ৰদৰ্শন কৰিবলৈ আমন্ত্ৰণ জনোৱা হৈছিল। পাৰ্টীটোত ব্যাপক হাৰত ড্ৰাগছ ব্যৱহাৰৰ বিষয়ে এক গোপন সূত্ৰৰ জৰিয়তে বাংগালুৰুৰ উলছুৰ আৰক্ষী থানাই জানিব পাৰি তাত অতৰ্কিতে অভিযান চলায়। এই অভিযানতে শক্তি কাপুৰৰ পুত্ৰ আৰু শ্ৰদ্ধা কাপুৰৰ ভাতৃ সিদ্ধান্তক দলৰ পৰা আন ৩৫জন লোকৰ সৈতে গ্ৰেপ্তাৰ কৰে আৰক্ষীয়ে। আৰক্ষীয়ে জনোৱা অনুসৰি, গ্ৰেপ্তাৰ কৰা সকলো লোকৰ তেজৰ নমুনা পৰীক্ষা কৰা হৈছিল। তাৰ ভিতৰত, সিদ্ধান্তসহ ৬ জন লোকৰ তেজত ড্ৰাগছৰ উপস্থিতি পোৱা গৈছিল।
 
এই বাতৰি প্ৰকাশ হোৱাৰ পাছতে তোলপাৰ লাগিছে বলীউডত। ঘটনাৰ বিষয়ে অৱগত হোৱাৰ পাছতে মূৰত আকাশী সৰগ ভাঙি পৰিছে বলীউডৰ তাৰকা অভিনেতা শক্তি কাপুৰৰ। ঘটনাৰ আকস্মিকতাত হতচকিত হৈ পৰা শক্তি কাপুৰে সংবাদ মাধ্যমৰ আগত কয়, ‘মই কেৱল ইয়াকে ক'ম যে এনে হ'বই নোৱাৰে।’ উল্লেখ্য যে, ২০২০ চনত সুশান্ত সিং ৰাজপুতৰ মৃত্যুৰ পাছত, এনচিবিয়ে ড্ৰাগছ কেলেংকাৰীৰ সন্দৰ্ভত শ্ৰদ্ধা কাপুৰকো সোধা-পোছা কৰিছিল। অৱশ্যে, তেওঁ কৈছিল যে তেওঁ কেতিয়াও ড্ৰাগছ গ্ৰহণ কৰা নাছিল। শ্ৰদ্ধাক কেইবাবাৰো জেৰা কৰাৰ পাছত গোচৰটোৰ পৰা ৰেহাই দিয়া হৈছিল।

ইফালে, শ্ৰদ্ধা আৰু পিতৃৰ পদাংক অনুসৰণ কৰি সিদ্ধান্ত কাপুৰেও অভিনয় জগতত ভৰি থৈছে। তেওঁ 'ভৌকাল'ত অভিনয় কৰিছিল। ইয়াৰ উপৰি, তেওঁ 'শ্বুটআউট এট ৱাডালা', 'অগলী', 'হাছিনা পাৰেকাৰ', 'চেহৰে'ৰ দৰে চলচ্চিত্ৰত অভিনয় কৰিছিল। তেওঁ ভালেমান চলচ্চিত্ৰত সহকাৰী পৰিচালক হিচাপেও কাম কৰিছে। উল্লেখ্য যে, শ্ৰদ্ধা বৰ্তমান ৰণবীৰ কাপুৰৰ সৈতে স্পেইনত তেওঁৰ চলচ্চিত্ৰৰ দৃশ্যগ্ৰহণত ব্যস্ত। ভাতৃৰ গ্ৰেপ্তাৰ সন্দৰ্ভত তেওঁৰ প্ৰতিক্ৰিয়া এতিয়ালৈ পোহৰলৈ অহা নাই।