'হাম ৰহে য়া না ৰহে কল..কল য়াদ আয়েংগে য়ে পল'-মৃত্যুৰ অলপ পূৰ্বে কেকেই গাইছিল এই গান

জীৱনৰ অন্তিম মূহুৰ্তলৈকে সংগীতপ্ৰেমীক মু্গ্ধ কৰি যাবলৈ তেওঁ নাপাহৰিলে। ৩১ মে'ৰ মঙলবাৰে নিশা কলকাতাত মৃত্যুক সাৱটি লয় জনপ্ৰিয় কণ্ঠশিল্পী কৃষ্ণকুমাৰ কুন্নাথে যাক সকলোৱে চিনি পায় কেকে নামেৰে। বিষয়াসকলে জনোৱা মতে, নাজৰুল মঞ্চৰ এখন কলেজে এটা সংগীত অনুষ্ঠানৰ আয়োজন কৰিছিল, মঞ্চত গীত গাই থাকোতেই কেকেই শাৰীৰিক অসুস্থতা অনুভৱ কৰিছিল।

 কণ্ঠশিল্পীগৰাকীক ব্যক্তিগত চিকিৎসালয়লৈ ততাতৈয়াকৈ লৈ যোৱা হয়, য’ত চিকিৎসকে তেওঁক মৃত বুলি ঘোষণা কৰে। মৃত্যুৰ মাত্ৰ অলপ পূৰ্বে লাইভ কনচাৰ্টতকে কেকেয়ে গাইছিল, "হাম ৰহে য়া না ৰহে কল..কল য়াদ আয়েংগে য়ে পল"। এই গানে সদায় অমৰ কৰি ৰাখিব কেকেক। যেতিয়াই স্মৃতি বা কিবা বিশেষ সময়ৰ কথা আহি পৰে তেতিয়াই মানুহে কেকেৰ এই গানটোক মনত পেলায় আৰু আমিও কেকেক মনত পেলাম তেওঁৰ এই বিশেষ চিৰসেউজ গীতেৰে। ছ'চিয়েল মিডিয়াত কণ্ঠশিল্পীগৰাকীৰ আকস্মিক মৃত্যুত তেওঁৰ অনুৰাগীসকলে গভীৰ শোক প্ৰকাশ কৰা দেখা গৈছে। য’ত তেওঁৰ শেষৰটো কনচাৰ্টৰ ভিডিঅ’বোৰ আটাইতকৈ বেছি শ্বেয়াৰ হৈছে।

 

কেকেৰ মৃত্যুত গভীৰ শোকৰ ছাঁ পৰিছে বলীউডত। ৫৩ বছৰীয়া কেকেয়ে হিন্দী, তামিল, তেলেগু, কানাড়া, বাংলাকে ধৰি কেইবাটাও ভাষাত গীত ৰেকৰ্ডিং কৰিছে। অসমীয়াতো গান গাইছিল বিশিষ্ট কণ্ঠশিল্পীগৰাকীয়ে। 'কাইটছ' ছবিৰ 'জিন্দেগী দ’ পল কী', 'ওম শান্তি ওম'ৰ 'আঁখো মে তেৰি', 'বাচনা এ হাছিনোৰ' 'খুদা জানে', 'হাম দিল দে চুকে চনম'ৰ 'তাড়প তাড়প', 'জন্নত'ৰ 'জাৰা চা', 'ৱহ লমহে'ৰ 'ক্যা মুঝে প্যাৰ হে' আদি গীতেৰে কেকে আজীৱন চিৰস্মৰণীয় হৈ থাকিব প্ৰতিজন গান ভালপোৱা মানুহৰ হৃদয়ত।