কাইলৈ যোগী আদিত্যনাথৰ জন্মদিন; সমৰ্থকে সাজু কৰিছে ৫১ কুইণ্টলৰ কেক

ডিজিটেল ডেস্ক: কাইলৈ উত্তৰ প্ৰদেশৰ মুখ্যমন্ত্ৰী যোগী আদিত্যনাথৰ ৪৯সংখ্যক জন্মদিন৷ কাইলৈ তেওঁৰ সমৰ্থকসকলে জন্মদিন উদযাপন কৰিবলৈ যো-জা চলাইছে৷ প্ৰিয়নেতাগৰাকীৰ জন্মদিনটোক উলহ-মালহেৰে উদযাপন কৰিবলৈ প্ৰস্তুতি সম্পূৰ্ণ কৰি তুলিছে যোগীৰ শুভাকাংক্ষীসকলে৷

যোগী আদিত্যনাথৰ জন্মদিন উপলক্ষে, তেওঁৰ সমৰ্থকসকলে কাইলৈ এটা ৫,১০০ কিলোগ্ৰাম ওজনৰ কেক কাটিব বুলি জানিব পৰা গৈছে। যোগীৰ জন্মদিন উপলক্ষে বিশেষভাৱে প্ৰস্তুত কৰি উলিওৱা এই বিশালকায় কেকটোৰ উচ্চতা ১৪ ফুট আৰু কেকটোৰ ব্যাস ১২ ফুট। খবৰ অনুসৰি, মুখ্যমন্ত্ৰীগৰাকীৰ জন্মদিন উপলক্ষে অযোধ্যাকে ধৰি উত্তৰ প্ৰদেশৰ বিভিন্ন চহৰত প্ৰায় পাঁচ লাখ লোকে হনুমান চালিছা পাঠ কৰিব।

মুখ্যমন্ত্ৰী যোগী আদিত্যনাথৰ জন্মদিন উদযাপন এইবেলি বিশাল আয়োজনেৰে অনুষ্ঠিত হ’ব৷ কিয়নো, যোগী আদিত্যনাথে উত্তৰ প্ৰদেশত একেৰাহে দ্বিতীয়বাৰৰ বাবে মুখ্যমন্ত্ৰীৰ আসনত অধিষ্ঠিত হৈছে৷ যোগী আদিত্যনাথৰ ঘনিষ্ঠ সূত্ৰই কয় যে মুখ্যমন্ত্ৰীয়ে কেতিয়াও তেওঁৰ জন্মদিন উদযাপন কৰা নাছিল আৰু অনুষ্ঠানটোৰ প্ৰস্তুতিৰ বিষয়েও অৱগত নাছিল।

মুখ্যমন্ত্ৰীয়ে জন্মদিনত কেৱল শুভেচ্ছা গ্ৰহণ কৰে৷ মুখ্যমন্ত্ৰী হিচাপে বিগত পাঁচ বছৰত তেওঁ উদযাপন বাদ দিছে আৰু কেৱল তেওঁৰ ৰাজনৈতিক সহকৰ্মী আৰু আমোলাসকলৰ পৰা শুভেচ্ছা গ্ৰহণ কৰে। অৱশ্যে, এই বছৰ মুখ্যমন্ত্ৰী যোগীৰ সমৰ্থকসকলে তেওঁৰ জন্মদিন জাকজমকতাৰে উদযাপন কৰাৰ পৰিকল্পনা কৰিছে। উত্তৰ প্ৰদেশৰ মুখ্যমন্ত্ৰী যোগী আদিত্যনাথৰ ১৯৭২ চনৰ ৫ জুনত উত্তৰাখণ্ডৰ পাউৰী গড়ৱালত জন্ম হৈছিল৷