কলিয়াবৰত ফিছাৰীত বিহ দি বৃহৎ পৰিমাণৰ মাছ নিধন কৰিলে কোনো দুৰ্বৃত্তই

ডিজিটেল ডেস্ক: কলিয়াবৰৰ কুঁৱৰীটোল মাধৱগাঁৱত সংঘটিত হৈছে এক অমানৱীয় ঘটনা। এটা ফিছাৰীত বিহ দি মাছ নিধন কৰিলে কোনো দুৰ্বৃত্তই। 

নিৰ্বাচনকেন্দ্ৰিক সংঘাতৰ বাবেই দুৰ্বৃত্তই পুখুৰীত বিহ দিয়াৰ অভিযোগ উত্থাপন হৈছে। সৌভাগ্য মাধৱ দেৱালয়ৰ পুখুৰীটোত মৎস্যপালন কৰি আহিছিল কুঁৱৰীটোলৰ মুন্না শৰ্মা নামৰ যুৱকজনে। 

কলিয়াবৰ সমষ্টিৰ নিৰ্দলীয় প্ৰাৰ্থী জিতেন গৌড়ৰ হৈ নিৰ্বাচনী প্ৰচাৰ চলোৱাৰ বাবেই কোনো দুৰ্বৃত্তই আক্ৰোশমূলকভাৱে পুখুৰীত বিহ দিয়াৰ অভিযোগ উত্থাপন কৰিছে মুন্না শৰ্মাই। পুৱাৰ ভাগতে বৃহৎ পৰিমাণৰ মাছ ইতিমধ্যে পানীত উপঙি উঠা প্ৰত্যক্ষ কৰে স্থানীয় লোকসকলে। মৃত মাছকেইটাৰ আকাৰ যথেষ্ট ডাঙৰ আছিল।

নিৰ্বাচনৰ প্ৰাকক্ষণত সংঘটিত এই ঘটনাই ব্যাপক প্ৰতিক্ৰিয়াৰ সৃষ্টি কৰিছে। দুৰ্বৃত্তৰ দৃষ্টান্তমূলক শাস্তি কামনা কৰিছে অঞ্চলবাসীয়ে।