কাশ্মীৰী পণ্ডিতক সুৰক্ষা দিয়াত ব্যৰ্থ কেন্দ্ৰীয় চৰকাৰ; যন্তৰ-মন্তৰত আৰু কি ক’লে কেজৰিৱালে?

ডিজিটেল ডেস্ক: কাশ্মীৰৰ পণ্ডিত হত্যাক লৈ উত্তাল হৈছে দেশ৷ কাশ্মীৰী পণ্ডিতসকলৰ হত্যাকাণ্ডক লৈ কেন্দ্ৰৰ বিৰুদ্ধে অৰবিন্দ কেজৰিৱালৰ নেতৃত্বত আম আদমী পাৰ্টীয়ে বাহিৰ কৰে এটা প্ৰতিবাদী সমদল৷ প্ৰতিবাদী সমদলত অংশ লৈ ‘আপ’ৰ সমৰ্থকসকলে কয়, কাশ্মীৰী পণ্ডিতসকলৰ পুনৰ্সংস্থাপনৰ ক্ষেত্ৰত কেন্দ্ৰৰ নীতি এক বৃহৎ বিফলতা হিচাপে প্ৰমাণিত হৈছে৷ আৰু কাশ্মীৰী পণ্ডিতসকলক সুৰক্ষা প্ৰদান কৰাত কেন্দ্ৰৰ বিফলতা আৰু অযোগ্যতাক আপে তীব্ৰভাৱে গৰিহণা দিছেে৷

দিল্লীৰ মুখ্যমন্ত্ৰী অৰবিন্দ কেজৰিৱালে আজি প্ৰতিবাদী সমদলত অংশ লৈ উদাত্ত কণ্ঠৰে কয় যে কাশ্মীৰী পণ্ডিতসকলক লক্ষ্য কৰি হত্যাৰ বাবে উপত্যকা এৰিবলৈ বাধ্য কৰোৱা হৈছিল৷ লগতে তেওঁ কেন্দ্ৰক কাশ্মীৰী পণ্ডিতক আক্ৰমণ বন্ধ কৰিবলৈ এক কাৰ্য-পৰিকল্পনা ঘোষণা কৰিবলৈ দাবী জনাইছে৷ দিল্লীৰ যন্তৰ-মন্তৰত আম আদমী পাৰ্টিৰ জন আক্ৰোশ ৰেলীক সম্বোধন কৰি তেওঁ কয় যে কাশ্মীৰী পণ্ডিতসকলে ১৯৯০ৰ দশকত তেওঁলোকৰ সৈতে হোৱা ঘটনাৰ পুনৰাবৃত্তিৰ সন্মুখীন হৈছে। বিজেপিয়ে কাশ্মীৰ চম্ভালিব নোৱাৰে, তেওঁলোকে কেৱল লেতেৰা ৰাজনীতি কেনেদৰে কৰিব লাগে সেয়াহে জানে। অনুগ্ৰহ কৰি কাশ্মীৰক লৈ ৰাজনীতি নকৰিব৷ 

আপৰ মুৰব্বীগৰাকীয়ে লগতে কয়, বিজেপি চৰকাৰে আনকি তেওঁলোকক (কাশ্মীৰী পণ্ডিতসকলক) হত্যাৰ প্ৰতিবাদ কৰিবলৈ অনুমতি দিয়া নাই। আপ কৰ্মী-সমৰ্থকক আৱদ্ধ কৰি তেওঁলোকৰ অধিকাৰ খৰ্ব কৰা হৈছে বুলি অভিযোগ কেজৰিৱালৰ৷ কেজৰিৱালে লগতে কয়, চৰকাৰে কাশ্মীৰত বাস কৰা লোকসকলক নিৰাপত্তা প্ৰদানত সম্পূৰ্ণৰূপে ব্যৰ্থ হৈছে। কেজৰিৱালে কাশ্মীৰত সন্ত্ৰাসবাদীক সমৰ্থন কৰাৰ অভিযোগ তুলি পাকিস্তানকো আক্ৰমণৰ লক্ষ্য কৰি লয়৷ মই পাকিস্তানক ক্ষুদ্ৰ কৌশল বন্ধ কৰিবলৈ ক’ব বিচাৰো। কাশ্মীৰ সদায় ভাৰতৰ অংশ হৈ থাকিব৷ 

কাশ্মীৰত সন্ত্ৰাসবাদীৰ দ্বাৰা লক্ষ্য কৰি হত্যাৰ ঘটনা সংঘটিত হৈছে, যিসকলে বেছিসংখ্যক হিন্দু আৰু অ-স্থানীয় লোকক লক্ষ্য কৰি লৈছে। ২০১২ চনত কেন্দ্ৰীয় চৰকাৰৰ আঁচনিৰ অধীনত নিযুক্তি লাভ কৰা কেইবাজনো কাশ্মীৰী পণ্ডিতে ১২ মে’ত মধ্য কাশ্মীৰৰ বডগাম জিলাৰ চাদুৰা অঞ্চলত সন্ত্ৰাসবাদীৰ গুলীত নিহত হোৱা ৰাহুল ভাটক হত্যা কৰাৰ পাছৰে পৰা গণ প্ৰস্থানৰ ভাবুকি দি প্ৰতিবাদ সাব্যস্ত কৰি আহিছে।

উল্লেখযোগ্য যে, ২ জুনত কাশ্মীৰত দুজন লোক - এজন বেংক কৰ্মচাৰী আৰু এজন ইটা ভাটা শ্ৰমিক নিহত হৈছিল আৰু আন এজন শ্ৰমিক দুটা পৃথক ঘটনাত আহত হৈছিল। ৩১ মে’ত দক্ষিণ কাশ্মীৰৰ কুলগাম জিলাৰ এখন বিদ্যালয়ত জম্মু অঞ্চলৰ চাম্বা জিলাৰ এগৰাকী মহিলা শিক্ষকক সন্ত্ৰাসবাদীয়ে গুলীয়াই হত্যা কৰিছিল। ১৮ মে’ত সন্ত্ৰাসবাদীয়ে উত্তৰ কাশ্মীৰৰ বাৰামুলাৰ এখন সুৰাৰ দোকানত প্ৰৱেশ কৰি গ্ৰেনেড নিক্ষেপ কৰিছিল, যাৰ ফলত জম্মু অঞ্চলৰ এজন লোক নিহত হৈছিল আৰু আন তিনিজন আহত হৈছিল। আৰক্ষী চৈফুল্লা কাদৰীক ২৪ মে’ত শ্ৰীনগৰত তেওঁৰ বাসগৃহৰ বাহিৰত গুলীয়াই হত্যা কৰা হৈছিল আনহাতে দুদিন পিছত বডগামত অভিনেত্ৰী অমৰিন ভাটক গুলীয়াই হত্যা কৰা হৈছিল।