সাংবাদিকগৰাকীৰ নাম সিদ্ধাৰ্থ বৰদৰাজন। প্ৰায়ে চৰকাৰ তথা আৰক্ষীৰ ভুল বোৰ উদঙাই দি আৰক্ষী-প্ৰশাসনৰ চকুৰ কূটা দাঁতৰ শাল হৈ পৰা সাংবাদিকগৰাকীয়ে এইবাৰ পুনৰ ন্যায় পালে।
ন্যায়পালিকাই সাংবাদিকগৰাকীক উপযুক্ত ন্যায় প্ৰদান কৰাত ন্যায় ব্যৱস্থাৰ প্ৰতি আস্থা থকা সকল স্বাভাৱিকতে উৎসাহিত হৈ পৰিছে।
তিনি খনকৈ কৃষি আইনৰ বিৰুদ্ধে দেশৰ বিভিন্ন প্ৰান্তকে ধৰি ৰাজধানী চহৰ দিল্লীত বছৰ জোৰা আন্দোলন চলোৱা কৃষকৰ দুখ-দুৰ্দশা তথা আৰক্ষীৰ নিৰ্যাতনৰ বাতৰি লিখি আৰক্ষীৰ ৰোষত পৰা 'দ্য ৱায়াৰ'ৰ প্ৰতিষ্ঠাপক সম্পাদক সিদ্ধাৰ্থ বৰদৰাজন আৰু সাংবাদিক ইছমত আৰাক অৱশেষত আদালতে সকাহ দিলে। বিগত বৰ্ষত গণৰাজ্য দিৱসৰ দিনা নতুন দিল্লীত আৰক্ষীৰ গুলীত নিহত কৃষকৰ বাতৰি লিখিছিল বৰদৰাজন আৰু ইছমত আৰাই। ইয়াৰ পিছতে বৰদৰাজন আৰু ইছমত আৰাই লিখা বাতৰিয়ে সমাজত অশান্তি বিয়পোৱাৰ আশংকা ব্যক্ত কৰি সাংবাদিক দুগৰাকীৰ বিৰুদ্ধে থানাত এজাহাৰ দাখিল কৰা হৈছিল। কিন্তু সকলো দিশ চালি-জাৰি চাই
এলাহাবাদ উচ্চ ন্যায়ালয়ে সিদ্ধাৰ্থ বৰদৰাজন আৰু প্ৰতিবেদক ইছমত আৰাৰ বিৰুদ্ধে উত্তৰ প্ৰদেশ আৰক্ষীৰ এজাহাৰ খন বাতিল কৰিছে।
এজাহাৰত উল্লেখ থকা অনুসৰি বৰদাৰজন আৰু আৰাক তেওঁলোকে লিখা বাতৰিৰ বাবে ধাৰা ১৫৩ বিৰ অধীনত অভিযুক্ত কৰা হৈছিল। উত্তৰ প্ৰদেশৰ ৰামপুৰত ভাৰতীয় দণ্ডবিধৰ ৫০৫(২) ধাৰাত তেওঁলোকৰ বিৰুদ্ধে গোচৰ ৰুজু হৈছিল। ৰামপুৰ জিলাৰ বাসিন্দা এজন সঞ্জু তুৰাহাৰ অভিযোগৰ ভিত্তিত উক্ত গোচৰ ৰুজু কৰা হৈছিল।
ৰামপুৰ আৰক্ষীয়ে এই বুলি অভিযোগ উত্থাপন কৰিছিল যে বৰদাৰজন আৰু আৰাৰ বাতৰিয়ে ৰাইজক বিপথে পৰিচালিত কৰিছিল আৰু জনসাধাৰণক প্ৰৰোচিত কৰাৰ লগতে সংঘৰ্ষ বিয়পাবলৈ উচটনি দিছিল।
আৰক্ষীৰ দাবীৰ বিপৰীতে ন্যায়াধীশ অশ্বিনী কুমাৰ মিশ্ৰ আৰু ৰজনীশ কুমাৰক লৈ গঠিত খণ্ড বিচাৰপীঠে এজাহাৰ খন সন্দৰ্ভত কয় যে আবেদনকাৰীৰ প্ৰতিবেদনত গুলীৰ আঘাতত মৃত্যু হোৱা ভুক্তভোগীৰ পৰিয়ালৰ ভাষ্যহে উদ্ধৃত কৰা হৈছে।
প্ৰতিবেদনখন তথ্যপূৰ্ণ হোৱাৰ লগতে কৃষকসকলৰ আন্দোলন সন্দৰ্ভত কোনো নিজস্ব মন্তব্য নাছিল।
ফলত প্ৰতিবেদন খনে কোনো লোকক হিংসাত জড়িত হ'বলৈ প্ৰৰোচিত কৰাৰ আশংকা নাছিল।
উল্লেখ্য উত্তৰ প্ৰদেশ আৰক্ষীয়ে ৩১ জানুৱাৰীতো এটা টুইট কৰাৰ বাবে বৰদৰাজনৰ বিৰুদ্ধে এজাহাৰ দাখিল কৰিছিল।
একেদৰে গণৰাজ্য দিৱসত আৰক্ষীৰ গুলীত নিহত যুৱকজনৰ ককাদেউতাক হৰদীপ সিং দিবদিবাৰ উদ্ধৃতিৰে তেওঁলোকে প্ৰতিবেদন খন প্ৰস্তুত কৰিছিল। প্ৰায়ে চৰকাৰ তথা আৰক্ষীৰ ভুল বোৰ উদঙাই দি অহা বাবেই সম্পাদক সিদ্ধাৰ্থ বৰদৰাজন আৰক্ষী-প্ৰশাসনৰ চকুৰ কূটা দাঁতৰ শাল হৈ আহিছে।
Continue Reading
