শাৰীৰিক প্ৰত্যাহ্বানক নেওচি মেট্ৰিক পৰীক্ষাত উজলিল নিজজুৰীয়াৰ আতিফ আহমেদ

ডিজিটেল ডেস্ক: অদম্য ইচ্ছাশক্তি থাকিলে শাৰীৰিক প্ৰতিবন্ধকতা কেতিয়াও সফলতাৰ বাটত বাধা হ’ব নোৱাৰে। শাৰীৰিক প্ৰত্যাহ্বানক নেওচি হাইস্কুল শিক্ষান্ত পৰীক্ষাত উজলিল নিজজুৰীয়াৰ আতিফ আহমেদ। চৰকাৰী বিদ্যালয়ৰ পৰা প্ৰথম বিভাগত উত্তীৰ্ণ আতিফ আহমেদ।

বিধাতাই হয়তো আতিফৰ খোজত শিকলি লগালেও, কিন্তু আতিফৰ উৰন্ত মনটোক বন্দী কৰিব পৰা নাছিল। সদ্যঘোষিত হাইস্কুল শিক্ষান্ত পৰীক্ষাত আতিফে প্ৰথম বিভাগত উত্তীৰ্ণ হৈ এক বিশেষ নিদৰ্শন দাঙি ধৰিছে। নিজজুৰীয়া গাঁৱৰ এইগৰাকী অদম্য সাহসী ছাত্ৰই প্ৰমাণ কৰি দিলে যে— শৰীৰৰ কোনো অংশই কাম নকৰিলেও, যদি মনৰ জোৰ থাকে, তেন্তে সফলতাৰ শিখৰত উপনীত হোৱাটো অসম্ভৱ নহয়। কোনো ব্যক্তিগত খণ্ডৰ স্কুল নহয়, এখন সাধাৰণ চৰকাৰী বিদ্যালয়ৰ পৰা অধ্যয়ন কৰিয়েই আজি আতিফে নিজজুৰীয়ালৈ গৌৰৱ কঢ়িয়াই আনিছে। 

অভাৱ আৰু শাৰীৰিক যন্ত্ৰণাক নেওচি দিন-ৰাতি একাকাৰ কৰি কৰা পৰিশ্ৰমৰ ফল আজি আতিফৰ হাতত। আতিফৰ এই সফলতাই আজি কেৱল তেওঁৰ পৰিয়ালকে নহয়, সমগ্ৰ জুৰীয়াবাসীক গৌৰৱান্বিত কৰিছে। যিসকল লোকে শাৰীৰিক অক্ষমতাক জীৱনৰ অন্ত বুলি ভাবে, তেওঁলোকৰ বাবে আজি আতিফ আহমেদ এক অনন্য নিদৰ্শন। খোজত বাধা আছিল সঁচা, কিন্তু লক্ষ্যত উপনীত হোৱাত আতিফক কোনেও ৰখাব নোৱাৰিলে।