প্ৰবঞ্চক স্বামী! ৭ বছৰে নিৰুদ্দেশ হৈ থকা স্বামীক নতুন পত্নীৰ সৈতে ৰীলত দেখি হতভম্ব প্ৰথম পত্নী

ডিজিটেল ডেস্কঃ ৭ বছৰ পূৰ্বে পত্নীক এৰি থৈ ৰহস্যজনকভাৱে নিৰুদ্দেশ হোৱা স্বামীক অৱশেষত বিচাৰি পালে পত্নীয়ে। এয়া সম্ভৱ হ’ল ভাইৰেল হোৱা এটা ইনষ্টাগ্ৰাম ৰীলৰ বাবে। নিৰুদ্দেশৰ নাটক সৃষ্টি কৰি পঞ্জাৱত দ্বিতীয়বাৰৰ বাবে বিবাহপাশত আবদ্ধ হোৱা জিতেন্দ্ৰ ওৰফে বাবলুক প্ৰথম পত্নীয়ে ছ'চিয়েল মিডিয়াত চিনি পালে।

উত্তৰ প্ৰদেশৰ হৰদয় জিলাত সংঘটিত হৈছে এই ঘটনা। ৭ বছৰে নিৰুদ্দেশ হৈ থকা স্বামীৰ কথা ভাবি নীৰৱে চকুলো টুকি থাকে পত্নীয়ে, ইফালে স্বামীয়ে নিৰুদ্দেশৰ নাটক কৰি নতুন পত্নীৰ সৈতে সংসাৰ কৰাত ব্যস্ত।  স্বামীৰ ৰীলবোৰ চাই প্ৰথম পত্নী প্ৰতিশোধৰ জুইত জ্বলিবলৈ ধৰিলে।

জিতেন্দ্ৰ নিৰুদ্দেশ হোৱাৰ পিছত স্বামীৰ পৰিয়ালে জিতেন্দ্ৰক নিৰুদ্দেশ কৰি হত্যা কৰাৰ অভিযোগ উত্থাপন কৰিছিল পত্নী তথা পত্নীৰ পৰিয়ালৰ বিৰুদ্ধে। তেতিয়াৰ পৰাই পত্নীয়ে একমাত্ৰ পুত্ৰৰ সৈতে দৰিদ্ৰতাত জীৱন কটাবলগীয়া হৈছে। ইমানখিনি অপবাদ তথা দুখ মূৰ পাতি লোৱা মহিলাগৰাকীয়ে এতিয়া স্বামীয়ে আন এগৰাকী মহিলাৰ সৈতে ৰীল বনোৱা দেখি কঠোৰ শাস্তি দিয়াৰ সিদ্ধান্ত লৈছে। 

তথ্য অনুসৰি ২০১৭ চনত আটামৌ গাঁৱৰ বাসিন্দা জিতেন্দ্ৰ ওৰফে বাবলুৰ সৈতে বিবাহপাশত আবদ্ধ হোৱা বুলি জানিবলৈ দিয়ে ভুক্তভোগী পত্নী শ্বীলুৱে।২০১৮ চনত স্বামী জিতেন্দ্ৰই হঠাতে পত্নী-পুত্ৰক এৰি নিৰুদ্দেশ হৈছিল। তেওঁৰ নিৰুদ্দেশৰ এজাহাৰ থানাত দাখিল কৰিছিল জিতেন্দ্ৰ ওৰফে বাবলুৰ পিতৃয়ে। লগতে পত্নীৰ আত্মীয়ই হত্যা কৰি মৃতদেহটো নিৰুদ্দেশ কৰাৰ অভিযোগ উত্থাপন কৰে জিতেন্দ্ৰৰ পৰিয়ালে ।

ভুক্তভোগী পত্নী শ্বীলুৱে নিজৰ মাতৃগৃহত সন্তানসহ দৰিদ্ৰতাৰে কটাবলগীয়া হৈছে। শ্বীলুৱে কয় যে তেওঁ স্বামীৰ উভতি অহাৰ সকলো আশা ত্যাগ কৰিছিল। তাৰ পিছত এদিন মোবাইলত ৰীল চাই থাকোঁতে তেওঁৰ ভৰিৰ তলৰ পৰা মাটি খহি পৰিল, যাক লৈ কান্দি আছিল তেওঁ নতুন পত্নীৰ সৈতে ৰীল বনাই ফূৰ্তি-আনন্দত ব্যস্ত।

স্বামী নিৰুদ্দেশ হোৱাৰ পিছত শ্বীলুৱে সকলো হেৰুৱাই, স্বামীৰ স্মৃতিৰে নিজৰ মাতৃগৃহত পুত্ৰৰ সৈতে সৰু জুপুৰি এটাত বাস কৰি আছে। শ্বীলুৱে কয় যে মোবাইলত ৰীল চাই থাকোতে জিতেন্দ্ৰ ওৰফে বাবলুক এগৰাকী মহিলাৰ সৈতে দেখা পাইছিল। সেইগৰাকী মহিলাৰ লগত তেওঁ বহু ৰীল বনাইছে। শ্বীলুৱে ক’লে যে তেওঁ আমাক সকলোকে মূৰ্খ সাজি লুধিয়ানাত নতুনকৈ বিয়া পাতি সুন্দৰ জীৱন কটাই আছে। ইফালে সন্তানৰ সৈতে তেওঁ শ্বাসৰুদ্ধ জীৱন কটাবলগীয়া হৈছে।

পত্নীয়ে স্বামীৰ বিৰুদ্ধে থানাত এজাহাৰ দাখিল কৰে। আৰক্ষীয়ে এজাহাৰৰ ভিত্তিত প্ৰথম পত্নীক প্ৰতাৰণা, দ্বিতীয় বিবাহ আৰু ভুৱা নিৰুদ্দেশৰ অভিযোগত গ্ৰেপ্তাৰ কৰিছে জিতেন্দ্ৰক।