বহিঃৰাজ্যত কৰ্মসংস্থাপনৰ বাবে গৈ সন্ধানহীন মৰাণৰ যুৱক

ডিজিটেল ডেস্কঃ  বহি:ৰাজ্যত কৰ্মসংস্থাপনৰ বাবে গৈ সন্ধানহীন মৰাণৰ যুৱক।  সাত মাহে সন্ধান নাই হালমাৰিৰ ইছৰাইল উৰাঙৰ, পৰিয়ালত হাহাকাৰ। বিগত ৭ মাহ ধৰি সন্ধানহীন হৈ আছে মৰাণৰ হালমাৰি চাহ বাগিচাৰ জংঘল লাইন নিবাসী ইছৰাইল উৰাং নামৰ ৩৫ বছৰীয়া যুৱকজন ৷

দুটি সন্তানৰ পিতৃ ইছৰাইলে বিগত মাৰ্চ মাহৰ ২০ তাৰিখে স্থানীয় কেইগৰাকীমান লগৰীয়াৰ সৈতে কেৰেলাত কৰ্মসংস্থাপন বিচাৰি ৰাওনা হৈছিল ৷ কিন্তু কেৰেলাৰ গন্তব্যস্থানত উপস্থিত হোৱাৰ পূৰ্বেই লগৰীয়াৰ সৈতে যোগাযোগ বিচিন্ন হৈ পৰিছিল ইছৰাইল উৰাঙৰ ৷

ঘৰখনৰ একমাত্ৰ উপাৰ্জনকাৰী ইছৰাইল উভটি আহিব বুলি আশাৰে বাট চাই আছিল পত্নী আৰু দুই সন্তানে ৷ কিন্তু সুদীৰ্ঘ সাত মাহে যুৱকজনৰ কোনো সন্ধান নোপোৱাত হাহাকাৰ পৰিস্থিতিৰ সৃষ্টি হৈছে পৰিয়ালটোত ৷ স্বামীৰ সন্ধান বিচাৰি পত্নীয়ে যোৱা ১৭ অক্টোবৰত খোৱাং আৰক্ষী থানাত এজাহাৰ দাখিল কৰিছে ৷