পৰকীয়া প্ৰেম! বিবাহিতা মহিলাৰ মুখত বিস্ফোৰক পাউডাৰ ঢালি দি হত্যা কৰিলে প্ৰেমিকে

ডিজিটেল ডেস্কঃ পৰকীয়া প্ৰেমৰ বাবেই বহু অঘটন ঘটি থকা দেখিবলৈ পোৱা যায়। পৰকীয়া প্ৰেমে ধ্বংস কৰিছে বহু সংসাৰ, কোনো কোনো হৈছে হত্যাৰ বলি। ক্ৰমান্বয়ে মহামাৰীৰ দৰে যেন শিপাইছে পৰকীয়া প্ৰেম, যিয়ে বৰ বেয়াকৈ আঘাত সানিছে আমাৰ সমাজক। বহু ঘটনা চকুৰ আগত দেখি থাকিও কিছুমান সাৱধান নহয়, যাৰ ফলত শেষ হয় জীৱন।

শেহতীয়াকৈ কৰ্ণাটকৰ মাইছোৰ জিলাৰ পৰা পোহৰলৈ আহিছে এক ভয়ংকৰ পৰকীয়া প্ৰেমৰ ঘটনা।ভেৰিয়া গাঁৱৰ এটা লজত বিবাহিতা প্ৰেমিকাক হত্যা কৰি পলায়ন কৰে প্ৰেমিকে। ঘটনাৰ তথ্য পোৱাৰ লগে লগে সেই স্থানত উপস্থিত হয় আৰক্ষী। মৃতদেহটো জিম্মাত লৈ মৰণোত্তৰ পৰীক্ষাৰ বাবে প্ৰেৰণ কৰি গোচৰটোৰ তদন্ত আৰম্ভ কৰিছে আৰক্ষীয়ে।

তথ্য অনুসৰি মৃত মহিলাগৰাকীৰ নাম ৰক্ষিতা। ৰক্ষিতাৰ স্বামী কৰ্মসূত্ৰে কেৰালাত থাকে। স্বামী বহিঃৰাজ্যত থকাৰ সুযোগ লৈ ৰক্ষিতাই সিদ্দাৰাজু নামৰ এজন যুৱকৰ সৈতে প্ৰেমৰ সম্পৰ্ক গঢ়ি তোলে। ঘটনাটো ঘটাৰ দিনা দুয়োজনেই মধুৰ মুহূৰ্ত কটাবলৈ এটা লজলৈ গৈছিল। তাতে কিবা এটা কথাক লৈ দুয়োৰে মাজত বিবাদ হৈছিল।

খঙত সিদ্দাৰাজুৱে ৰক্ষিতাৰ মুখত বিস্ফোৰক পাউডাৰ ঢালি দি হত্যা কৰে। বিবাহিতা প্ৰেমিকাক হত্যা কৰাৰ পিছত সিদ্দাৰাজুৱে এই ঘটনাটোক মোবাইল ফোন বিস্ফোৰণ বুলি দেখুৱাবলৈ চেষ্টা কৰে। অৱশ্যে সেই স্থানৰ পৰা পলাবলৈ চেষ্টা কৰোতে স্থানীয় ৰাইজে তেওঁক ধৰি আৰক্ষীৰ হাতত গতাই দিয়ে।

মহিলাগৰাকীৰ মৃতদেহ বিছনাতে পৰি থকা অৱস্থাত উদ্ধাৰ হয়। তেওঁৰ মুখখন বিস্ফোৰকেৰে উৰুৱাই দিয়া হৈছিল।

হত্যাকাণ্ডত ব্যৱহৃত বিস্ফোৰক পদাৰ্থৰ তদন্ত এফ এছ এলৰ দলে অব্যাহত ৰাখিছে। এই সন্দৰ্ভত আৰক্ষীয়ে অধিক তদন্ত আৰম্ভ কৰিছে।