ডিজিটেল ডেস্কঃ কঁঠাল বৰ্ষা কালৰ সুস্বাদু ৰসাল ফল। কঁঠাল গছ অসমৰ মানুহৰ বাৰী বা বন-বননিৰ মাজত হয়। হাবি-জংঘলতো কঁঠাল আপোনা-আপুনি গজে। সাধাৰণতে মাঘ-ফাগুন মাহৰ পৰা কঁঠালৰ কলি ওলাবলৈ আৰম্ভ কৰে, যাক মুচি পেলোৱা বা মুচি ধৰা বুলি কয়। কঁঠাল মুচিৰে অতি সোৱাদযুক্ত ব্যঞ্জন ৰন্ধা হয়। কঁঠাল ব’হাগ, জেঠ, আহাৰ মাহত পুৰঠ হৈ পকিবলৈ ধৰে। কিছুমান কঁঠাল আছে বছৰৰ বাৰমাহে লাগে।
আপোনাক যদি সোধা যায় যে কঁঠালৰ ৰং কেনেকুৱা.. আপুনি নিশ্চয়কৈ ক'ব সেউজীয়া। কঁঠালৰ বাকলি সেউজীয়া ৰঙৰ থাকে আৰু ভিতৰৰ কোঁহবোৰ হালধীয়া ৰঙৰ হয়। আপুনি কেতিয়াবা ৰঙা ৰঙৰ কঁঠাল দেখিছেনে?... ক'ত পোৱা যায় ৰঙা ৰঙৰ কঁঠাল? এই পৃথিৱীত প্ৰকৃতিয়ে নানা ব্যতিক্ৰমী বস্তু সৃষ্টি কৰিছে, তাৰ ভিতৰত ৰঙা কঁঠালো অন্যতম। ভিয়েটনামত পোৱা যায় ৰঙা ৰঙৰ কঁঠাল। ইয়াৰ ভিতৰৰ কোঁহবোৰো ৰঙা। এই প্ৰজাতিৰ কঁঠালত আঠা নাথাকে। ই খাবলৈ অতি সোৱাদযুক্ত আৰু মিঠা। সাধাৰণ কঁঠালতকৈ ৰঙা ৰঙৰ কঁঠালৰ দাম তিনিৰ পৰা চাৰিগুণ বেছি। অৱশ্যে এই কঁঠালৰ আকাৰ অলপ সৰু। ভিয়েটনামী ৰঙা কঁঠালৰ বৈচিত্ৰ্যই সকলোকে আকৰ্ষিত কৰে।
বৰ্তমান এই কঁঠালৰ খেতি ভিন্ন দেশৰ মানুহে কৰিবলৈ লৈছে। ভিয়েটনামী ৰঙা কঁঠাল গছৰ পুলি আজিকালি ভিন্ন নাৰ্চাৰীত উপলব্ধ। এই ৰঙা কঁঠাল চোতাল, পুখুৰীৰ পাৰত, ব্যৱসায়িক বাগিচাত ৰোপণ কৰিব পাৰি। চখ হিচাপে ঘৰত এজোপা বা দুজোপা গছ ৰোপণ কৰিব পাৰি। সুস্থ, জোৰদাৰ আৰু ৰোগমুক্ত পুলি জেঠ মাহৰ মাজৰ সময়ৰ পৰা শাওনৰ মাজভাগলৈ ৰোপণ কৰিব লাগে। গছৰ পৰা গছলৈ দূৰত্ব ১২ মিটাৰ ৰখাই ভাল। ৰোপণ কৰাৰ পিছত নিয়মীয়া ৰক্ষণাবেক্ষণ আৰু যত্নৰ বাহিৰে আন একো কৰিব নালাগে। এই কঁঠাল গছৰ ফুল ফুলাৰ পিছত কঁঠাল পকিবলৈ ১২০-১৫০ দিন সময় লাগে।
Continue Reading
