প্ৰথমবাৰলৈ কৰাচী টেষ্টৰ গোপন ৰহস্য ফাদিল: বিস্ফোৰক স্বীকাৰোক্তি ছোৱেইবৰ, ‘শচীনক আহত কৰাই আছিল মোৰ উদ্দেশ্য...’

ডিজিটেল ডেস্কঃ শচীন তেণ্ডুলকাৰ আৰু ছোৱেইব আখতাৰৰ বেট-বলৰ যুঁজৰ কাহিনী ইমান বছৰৰ পাছতো বাৰে বাৰে উন্মেষ ঘটে। নিজৰ সময়ৰ আটাইতকৈ দ্ৰুততম বলাৰ ছোৱেইবক ‘মাষ্টাৰ ব্লাষ্টাৰ’ শচীনৰ বিৰুদ্ধে ৰোমাঞ্চকৰ যুঁজখনৰ বাবে সকলোৱে আগ্ৰহেৰে বাট চাই আছিল। ২০০৬ চনত ভাৰতীয় দলটোৱে পাকিস্তান ভ্ৰমণৰ সময়ত তেওঁলোকৰ সংগ্ৰামৰ এনে এটা কাহিনী শেহতীয়াকৈ উত্থাপন কৰিছে ছোৱেইব আখতাৰে। শচীনৰ মূৰত বল মাৰি আহত কৰিব বিচাৰিছিল বুলিও জনাইছে আখতাৰে।

২০০৬ চনৰ ভাৰত-পাকিস্তানৰ মাজত টেষ্ট শৃংখলাৰ অন্তিমখন খেল অনুষ্ঠিত হৈছিল কৰাচীত। সেই মেচখনৰ এটা ঘটনাৰ বিষয়ে স্প’ৰ্টস্কিডাকত উনুকিয়াইছে ছোৱেইব আখতাৰে । তেওঁ কয়, ‘এই কাহিনীটো মই প্ৰথমবাৰৰ বাবে ক’বলৈ লৈছো। ইচ্ছাকৃতভাৱে সেই টেষ্টত শচীনক আহত কৰিব বিচাৰিছিলো। ইঞ্জামামে বাৰে বাৰে মোক বলটো উইকেটৰ আগত ৰাখিবলৈ কৈছিল, কিন্তু মোৰ লক্ষ্য আছিল শচীনক আঘাত কৰা। তেনেকৈয়ে মই তেওঁৰ হেলমেটত বলটো মাৰিবলৈ সক্ষম হৈছিলো আৰু মনতে ভাবিছিলো যে মোৰ উদ্দেশ্য পূৰণ হ’ল। কিন্তু ভিডিঅ’টো চোৱাৰ পিছত বুজিছিলোঁ যে শচীনে নিজকে বচাবলৈ সক্ষম হৈছে।’

আখতাৰে লগতে কয় যে যদিও তেওঁ অহৰহ শচীনক আঘাত কৰাৰ চেষ্টা চলাই গৈছিল, তথাপি প্ৰকৃত কামটো কৰিছিল মহম্মদ আছিফে। প্ৰাক্তন পাক তাৰকাগৰাকীয়ে লগেত কয়, ‘মই শচীনক পুনৰ আঘাত কৰিবলৈ চেষ্টা কৰি থাকিলোঁ। আনহাতে, ভাৰতীয় বেটছমেনজনে আছিফৰ বিৰুদ্ধে যুঁজি আছিল। সেইদিনা আছিফে যি কৰিলে, মই মোৰ জীৱনত এনে কাম কৰা মানুহ খুব কমেইহে দেখিছোঁ।’

কৰাচীৰ এই টেষ্ট মেচখন কেইবাটাও কাৰণত স্মৰণীয় হৈ ৰ’ব ক্ৰিকেট ইতিহাসত। এইখন টেষ্টতে ইৰফান পাঠাৰ হেট্ৰিকৰ পাছতো আছিফে প্ৰথম ইনিংছত ৪টা আৰু দ্বিতীয় ইনিংছত ৩টা উইকেট দখল কৰি পাকিস্তানক ৩৪১ ৰানৰ বিশাল ব্যৱধানত জয়লাভ কৰিছিল। কৰাচী টেষ্টত জয়লাভ কৰাৰ পাছত পাকিস্তানে  ১-০ৰ ব্যৱধানত টেষ্ট শৃংখলাত জয়ী হ’বলৈ সক্ষম হৈছিল৷