ডিজিটেল ডেস্কঃ কাজিয়া লাগি পত্নীৰ নাক চিঙিলে স্বামীয়ে। গুৰুতৰভাৱে আঘাতপ্ৰাপ্ত পত্নী এতিয়া হাস্পতালত ভৰ্তি হৈ আছে। এই ঘটনা সংঘটিত হৈছে উত্তৰ প্ৰদেশৰ বাহৰাইচত। ভুক্তভোগী মহিলাগৰাকীৰ নাম ৰজনী দেৱী। তেওঁ বেডনাপুৰৰ বিদ্যুৎ বিভাগৰ কৰ্মচাৰী। ৰজনীৰ স্বামীৰ নাম জ্ঞানদত্ত পাঠক। জ্ঞানদত্তৰ লগত প্ৰায়ে কাজিয়া হয় ৰজনী দেৱীৰ।
এদিন কাজিয়া লাগি খং উঠাত মাতৃৰ ঘৰলৈ গুচি গৈছিল ৰজনী দেৱী। মাতৃগৃহত থাকোতে ৰজনীক ফোন কৰি ক্ষমা খোজে জ্ঞানদত্ত পাঠকে আৰু তেওঁক ঘৰলৈ ঘূৰি আহিবলৈ কয়। স্বামীৰ কথাত ভোল গৈ মাতৃগৃহৰ পৰা স্বামীগৃহলৈ যাত্ৰা কৰে ২৬ বছৰীয়া ৰজনী দেৱীয়ে। পাছে জ্ঞানদত্ত পাঠকে কৰিছিল এক ভয়ংকৰ পৰিকল্পনা। পৰিকল্পনা মতেই মহিলাগৰাকী আহি থকা পথত খাপ পিটি ৰৈ থাকে জ্ঞানদত্ত।
তেওঁৰ লগত আছিল অন্য দুজন সংগী। ৰজনী আহি থাকোতে বাট আগচি ধৰে জ্ঞানদত্ত আৰু তেওঁৰ সংগী দুজনে। তিনিও মিলি ৰজনী দেৱীক আক্ৰমণ কৰে। স্বামী জ্ঞানদত্তই এপাকত দাঁতেৰে কামুৰি ৰজনীৰ নাক চিঙি দিয়ে। স্থানীয় লোকে ততাতৈয়াকৈ হাস্পতালত ভৰ্তি কৰোৱায় গুৰুতৰভাৱে আহত ৰজনীক। মাতৃ কুসুম তিৱাৰীয়ে জোঁৱায়েকৰ বিৰুদ্ধে এজাহাৰ দাখিল কৰিছে। ঘটনাৰ পাছৰে পৰা অভিযুক্ত পলাতক হৈ আছে। আৰক্ষীয়ে সমগ্ৰ ঘটনাৰ জোৰদাৰ তদন্তত নামি পৰিছে।
Continue Reading
