ডিজিটেল ডেস্কঃ আইপিএলত এইবাৰ নতুনকৈ অভিষেক ঘটা গুজৰাট টাইটানছে ডেভিদ মিলাৰ আৰু ৰছিদ খানৰ অনবদ্য বেটিং প্ৰদৰ্শনেৰে চলিত আইপিএল ২০২২-ত পঞ্চম জয় সাব্যস্ত কৰিবলৈ সক্ষম হৈছে। দেওবাৰে অনুষ্ঠিত খেলখনত প্ৰথমে বেট কৰি চেন্নাইয়ে ১৭০ ৰানৰ লক্ষ্য বান্ধি দিছিল গুজৰাটক। চেন্নাইৰ হৈ ৰিতুৰাজ আৰু ৰাইডুৱে সৰ্বাধিক ৭৩ আৰু ৪৬ ৰানৰ বৰঙনি আগবঢ়ায়। পূৰ্বৰ মেচখনৰ দৰে গুজৰাটৰ বিৰুদ্ধে বেটিং বিক্ৰমত ব্যৰ্থ হয় ৰবীন উথাপ্পা আৰু শিৱম ডুবে।
চেন্নাইয়ে বান্ধি দিয়া লক্ষ্যৰ চোঁচা লোৱাৰ উদ্দেশ্যে ইনিংছ আৰম্ভ কৰে গুজৰাটে। ৭উইকেট হেৰুৱাই নিৰ্ধাৰিত লক্ষ্যত উপনীত হয় গুজৰাট। ডেভিড মিলাৰৰ অপৰাজিত ৯৪ ৰানে দলটোৰ জয়ৰ পথ মসৃন কৰি তোলে। মিলাৰৰ সমান্তৰালকৈ ৪০ ৰানৰ উল্লেখনীয় বৰঙনি আগবঢ়ায় অধিনায়ক ৰছিদ খানে। এই জয়েৰে গুজৰাটে পইণ্ট তালিকাৰ শীৰ্ষ স্থানলৈ উন্নীত হৈছে। বিপৰীতে চলিত ছিজনত চেন্নাইয়ে ৬খনৰ ভিতৰত মাত্ৰ ১খনতে জয়ৰ মুখ দেখিছে।
স্মৰ্তব্য যে, খেলখন আৰম্ভ হোৱাৰ আগতে বিন্দু মাত্ৰও ধাৰণা কৰিব পৰা হোৱা নাছিল কোনটো দল জয়ী হ’ব। চেন্নাইৰ বিৰুদ্ধে টছ কৰিবলৈ আহি ৰছিদ খানে কয়, ‘আজিৰ খেলৰ মই অধিনায়ক। অসুস্থতাৰ বাবে হাৰ্দিক পাণ্ডিয়াই খেলিব নোৱাৰিব। হাৰ্দিকৰ স্থানত আলজাৰি যোচেফক গুজৰাটৰ দলত অন্তৰ্ভুক্ত কৰা হৈছে।’ নিঃসন্দেহে ৰছিদৰ এই আপডেটে সুখী কৰি তুলিছিল চেন্নাইৰ অনুৰাগীক।
অৱশ্যে, সেই হাঁহি অন্তিম মুহূৰ্তলৈ ধৰি ৰাখিব নোৱাৰিলে চেন্নাইৰ অনুৰাগীয়ে। কাৰণ, হাৰ্দিকৰ অনুপস্থিতিতো মিলাৰৰ অনবদ্য বেটিং আৰু ৰছিদৰ নেতৃত্বই গুজৰাটৰ বিজৰ পথ প্ৰশস্ত কৰি তুলিছিল। উল্লেখ্য যে, চেন্নাইৰ এই ক্ৰমাগত পৰাজয়ে প্লে’ অফৰ বাটো কঠিন কৰি তুলিছে। আৰু এখন মেচত পৰাজিত হোৱাৰ পাছতে প্লে’ অফত যোগ্যতা অৰ্জনৰ বাট সম্পূৰ্ণৰূপে বন্ধ ৱৈ পৰিব চেন্নাইৰ।
Continue Reading
