পেট্ৰ’ল-ডিজেলৰ বৰ্ধিত দামৰ বিপৰীতে ইণ্ডিয়ান অইলৰ নতুন অভিলেখ

ডিজিটেল ডেস্ক: পেট্ৰ’ল আৰু ডিজেলৰ আকাশচুম্বী দামবৃদ্ধিৰ মাজতে ‘ইণ্ডিয়ান অইল’-এ গঢ়িছে নতুন অভিলেখ৷ কেন্দ্ৰীয় চৰকাৰৰ অধীনস্থ দেশৰ আগশাৰীৰ পেট্ৰ’লিয়াম উৎপাদক প্ৰতিষ্ঠান ইণ্ডিয়ান অইলে বিগত বিত্তীয় বৰ্ষত গঢ়িলে এক নতুন অভিলেখ৷ প্ৰতিষ্ঠানটোৱে প্ৰকাশ কৰা তথ্য অনুসৰি, ২০২১-২২ বিত্তীয় বৰ্ষত প্ৰতিষ্ঠানটোৱে লাভ কৰিছে ২৪,১৮৪ কোটি টকা৷ এই পৰিসংখ্যা এনে সময়ত প্ৰকাশ পাইছে, যিসময়ত পেট্ৰ’ল, ডিজেল আৰু এলপিজিৰ আকাশচুম্বী দামে জনজীৱন বিপৰ্যস্ত কৰি তুলিছে৷ আৰু, জনসাধাৰণে দাম হ্ৰাস হোৱালৈ অপেক্ষা কৰি আছে।

 ইণ্ডিয়ান অইলে ৩১ মাৰ্চত সমাপ্ত হোৱা ২০২১-২২ বিত্তীয় বৰ্ষৰ বাবে প্ৰতিষ্ঠানটোৰ উপাৰ্জনৰ তথ্য দাখিল কৰিছে। তথ্য অনুসৰি, ২০২১-২২ বৰ্ষত প্ৰতিষ্ঠানটোৱে মুঠ ৰাজহ আৰু লাভৰ ক্ষেত্ৰত এক অভিলেখ স্থাপন কৰিছে। এই বছৰ, প্ৰতিষ্ঠানটোৱে পূৰ্বৰ ২০২০-২১ বৰ্ষৰ ৫,১৪,৮৯০ কোটি টকাৰ বিপৰীতে মুঠ ৭,২৮,৪৬০ কোটি টকা উপাৰ্জন কৰিছিল।

ইণ্ডিয়ান অইলে কিমান পৰিমাণৰ ধন লাভ কৰিছে?

কোম্পানীটোৱে লাভৰ ক্ষেত্ৰতো এটা অভিলেখ স্থাপন কৰিছে। ২০২১-২২ বৰ্ষত, কোম্পানীটোৰ মুঠ লাভ আছিল ২৪,১৮৪ কোটি টকা, যি এতিয়ালৈকে সৰ্বাধিক। ২০২০-২১ বৰ্ষত কোম্পানীটোৰ মুঠ লাভ আছিল ২১,৮৩৬ কোটি টকা, যাৰ অৰ্থ হৈছে যে এই বছৰ প্ৰতিষ্ঠানটোৱে প্ৰায় ২,৩০০ কোটি টকা অধিক লাভ কৰিছে। অৱশ্যে, ২০২০-২১ বৰ্ষৰ (জানুৱাৰী-মাৰ্চ) অন্তিম তিনিমাহৰ তুলনাত ২০২১-২২ বৰ্ষৰ অন্তিম তিনিমাহত ৰাজহ বৃদ্ধি হোৱা সত্ত্বেও প্ৰতিষ্ঠানটোৰ লাভ হ্ৰাস পাইছে।

চৰকাৰৰ বিৰুদ্ধে বিৰোধীৰ অভিযোগ কি?

বিৰোধীয়ে নিৰন্তৰভাৱে চৰকাৰক পেট্ৰ’ল আৰু ডিজেলৰ জৰিয়তে লাভ ৰখাৰ অভিযোগ কৰি আহিছে। এই মুহূৰ্তত পেট্ৰ’ল আৰু ডিজেলৰ মূল্য আকাশচুম্বী হৈ আছে। বহুতো ৰাজ্যত, পেট্ৰ’ল আৰু ডিজেলৰ দাম প্ৰতিলিটাৰত ১০০ টকা অতিক্ৰম কৰিছে। একেসময়তে, ঘৰুৱা এলপিজি চিলিণ্ডাৰৰ মূল্য প্ৰতিটো চিলিণ্ডাৰত ১০০০ টকা অতিক্ৰম কৰিছে। এনে পৰিস্থিতিত, এই পৰিসংখ্যাবোৰে বিৰোধীক চৰকাৰক আক্ৰমণ কৰাৰ আৰু এটা সুযোগ দিব বুলি ৰাজনৈতিক বিশ্লেষকসকলে মন্তব্য কৰিছে৷