সঘনাই চকুত আজিনা (আচিনা) হয় নেকি, জানি লওক ঘৰুৱা পদ্ধতিৰে এই সমস্যা সমাধানৰ কৌশল

ডিজিটেল ডেস্ক : আজিনা ইমান ডাঙৰ সমস্যা নহ’লেও চকুৰ পতাত সৰু সৰু ফোঁহা হ’লে অত্যন্ত বিষ অনুভৱ হয়। বছৰৰ বিভিন্ন সময়ত বহু লোকে এই সমস্যাত ভুগিবলগীয়া হয়। চকুত মলি জমা হোৱা বা চকু পৰিষ্কাৰ কৰিবলৈ চকু নোধোৱাটো আজিনা হোৱাৰ প্ৰধান কাৰণ বুলি গণ্য কৰা হয়। চিকিৎসা বিজ্ঞানৰ ভাষাত ইয়াক ‘stye or hordeolum’ বুলি কোৱা হয়। চকুত বহুতো ক্ষুদ্ৰ ক্ষুদ্ৰ তেলগ্ৰন্থি থাকে। বিশেষকৈ চকুৰ পতাত। সেই গ্ৰন্থিবোৰত মৃত কোষ, মলি, তেল জমা হৈ মুখবোৰ বন্ধ হৈ পৰে। তাত বেক্টেৰিয়াৰ সংক্ৰমণ হয় আৰু ইয়াৰ পৰাই আজিনাৰ দৰে সমস্যাৰ সৃষ্টি হয়। যদিও আজিনা কোনো ডাঙৰ সমস্যা নহয়, কিন্তু বেছি সময় ধৰি হৈ থাকিলে চকুৰ গুৰুতৰ ক্ষতি হোৱাৰ আশংকা থাকে।

 আজিনা কেনেকৈ নিৰ্মূল কৰিব পাৰি?

১) কোমল কাপোৰ এখন লৈ অলপ গৰম কৰি লাহে লাহে লগাই দিব লাগে। অতিমাত্ৰা গৰম হ’ব নালাগে। ইয়াৰ ফলত সংক্ৰমণৰ আশংকা হ্ৰাস পায় আৰু গ্ৰন্থিৰ মুখত জমা হোৱা তেল শুকাবলৈ আৰম্ভ হয় লগতে বিষো সোনকালে কমি যায়।

২) চকুত আজিনা হ’লে ভুলতো মেকআপ নকৰিব। ইয়াৰ ফলত আনটো চকুলৈ বেক্টেৰিয়াৰ সংক্ৰমণ বৃদ্ধি পাব পাৰে। আনহাতে মেকআপ কৰিলে সংক্ৰমণ বৃদ্ধি পোৱাৰ আশংকা বাঢ়ি যায়।

৩) এই সময়ত কোনো ধৰণৰ কনটেক্ট লেন্স ব্যৱহাৰ নকৰিব। ইয়াৰ ফলত সমস্যা বাঢ়িব পাৰে।

 ৪) চাহত বেক্টেৰিয়া বিৰোধী গুণ থাকে। টি-বেগৰে গৰম চাহৰ ভাপো চকুত দিব পাৰে। ইয়াৰ ফলত চকুৰ ফুলা হ্ৰাস হোৱাৰ লগতে সংক্ৰমণো কমিব।

৫) চকুৰ পতাত বিশুদ্ধ কেষ্টাৰ অইল লগাব পাৰে। কিন্তু কেষ্টাৰ অইল লগোৱাৰ আগতে তেলৰ ম্যাদ পৰীক্ষা কৰি সময়সীমাৰ ভিতৰত থাকে, তেন্তে আপুনি ইয়াক ব্যৱহাৰ কৰিব পাৰে। ই বেক্টেৰিয়াৰ সংক্ৰমণৰ সম্ভাৱনা হ্ৰাস কৰে।