শ্বেখ ছাজ্জাদ গুলৰ পৰিকল্পনাতে হৈছিল পহলগাম-কাণ্ড

যোৱা ২২ এপ্রিলত ২৬জন নিৰীহ লোকে প্রাণ হেৰুওৱা সন্ত্রাসবাদীৰ এই বৰ্ষৰ আক্ৰমণটোৰ পাছত ৰাষ্ট্ৰীয় অনুসন্ধানকাৰী সংস্থাই (নিয়া) চলোৱা তদন্তত এই তথ্য পোহৰলৈ আহিছে। কুখ্যাত সন্ত্রাসবাদী সংগঠন লস্কৰ-এ-তৈয়বাৰ (এল ই টি) পৃষ্ঠপোষকতাত পাকিস্তানৰ ৰাৱালপিণ্ডিত আত্মগোপন কৰি থকা শ্বেখ ছাজাদ গুলে ছাজাদ আহমেদ শ্বেইখ নাম লৈ কেইবাটাও সন্ত্রাসবাদী আক্ৰমণৰ পৰিকল্পনা কৰিছিল।

মধ্য আৰু দক্ষিণ কাশ্মীৰত ২০২০ আৰু ২০২৪-ৰ মাজত হোৱা সন্ত্রাসবাদী আক্ৰমণৰো মাষ্টাৰমাইণ্ড আছিল শ্বেখ ছাজ্জাদ গুল। তদুপৰি, ২০২৩ চনত মধ্য কাশ্মীৰৰ অনন্তনাগ, গংগাগীৰ আক্রমণটোৰো এই সন্ত্রাসবাদীটো মূল ষড়যন্ত্রকাৰী আছিল। ২০২২ চনৰ এপ্ৰিলত নিয়াই এই ছাজাদক সন্ত্রাসবাদী হিচাপে ঘোষণা কৰিছিল আৰু তেওঁৰ মূৰৰ বিনিময়ত ১০ লাখ টকাৰ পুৰস্কাৰ ঘোষণা কৰিছিল।

২২ এপ্রিলৰ পহলগাম-কাণ্ডৰ পাছত নিয়াই চলোৱা তদন্তত এই শ্বেখ ছাজ্জাদ গুলৰ আক্ৰমণটোৰ সৈতে জড়িত থকাৰ সম্পূৰ্ণ তথ্য লাভ কৰা হৈছে। প্রণিধানযোগ্য যে আক্ৰমণটোৰ কেইঘণ্টামানৰ পাছতেই ৰেজিছটেন্স ফ্রন্টে আক্ৰমণটোৰ দায়িত্ব স্বীকাৰ কৰিছিল যদিও পৰৱৰ্তী দিনটোতে নিষিদ্ধ সংগঠনটোৱে ওলোটা খৰ মাৰিছিল।

উৎসঃ দৈনিক জনমভূমি