হোজাইত চাঞ্চল্য; প্ৰেমিকৰ ব্লেকমেইলৰ বলি হৈ কীটনাশক দ্ৰব্য সেৱন কৰি কিশোৰীৰ আত্ম*হনন

ডিজিটেল ডেস্ক: হোজাই জিলাৰ মোৰাঝাৰ থানাৰ অন্তৰ্গত পুৱ জাৰুণীত এক অত্যন্ত বেদনাদায়ক তথা চাঞ্চল্যকৰ ঘটনা সংঘটিত হৈছে। এজন ভণ্ড প্ৰেমিকৰ ব্লেকমেইলিঙৰ বলি হৈ এগৰাকী নাবালিকাই বিষাক্ত কীটনাশক দ্ৰব্য সেৱন কৰি আত্মহত্যা কৰাৰ ঘটনাই সমগ্ৰ অঞ্চলটোতে তীব্ৰ প্ৰতিক্ৰিয়াৰ সৃষ্টি কৰিছে।

স্থানীয় সূত্ৰৰ পৰা লাভ কৰা তথ্য অনুসৰি, অভিযুক্ত যুৱক শ্বাহিন আহমেদে কিশোৰীগৰাকীক ঘৰৰ পৰা পলুৱাই লৈ যাবলৈ চেষ্টা কৰিছিল। কিন্তু কিশোৰীগৰাকীয়ে তেওঁৰ সৈতে পলাই যাবলৈ সম্পূৰ্ণৰূপে অমান্তি হয়। কিশোৰীগৰাকীৰ বয়স আছিল ১৭ বছৰ।

পলাই যাবলৈ অস্বীকাৰ কৰাৰ পিছৰে পৰাই ভণ্ড প্ৰেমিক শ্বাহিনে কিশোৰীগৰাকীক মানসিকভাৱে হাৰাশাস্তি কৰা আৰম্ভ কৰে। আনকি তেওঁলোকৰ কিছুমান অন্তৰংগ মুহূৰ্তৰ ফটো ছ'চিয়েল মিডিয়াত ভাইৰেল কৰি দিয়াৰ তীব্ৰ ভাবুকিও প্ৰদান কৰে যুৱকজনে।

প্ৰেমিকৰ এনে ব্লেকমেইলিং আৰু সামাজিক মৰ্যাদা হানি হোৱাৰ ভয়তে দিশহাৰা হৈ কিশোৰীগৰাকীয়ে অৱশেষত কীটনাশক দ্ৰব্য সেৱন কৰি চৰম পথ বাচি লয়। কিন্তু মৃত্যুৰ ঠিক পূৰ্বমুহূৰ্তত, চিকিৎসাধীন অৱস্থাত কিশোৰীগৰাকীয়ে তেওঁৰ পৰিয়ালৰ লোকৰ সন্মুখত প্ৰেমিক শ্বাহিন আহমেদে কৰা সকলো অত্যাচাৰ আৰু ব্লেকমেইলিঙৰ কথা ভাঙি পাতি কয়।

কিশোৰীগৰাকীৰ মৃত্যুৰ পিছতেই সমগ্ৰ অঞ্চলটোত শোকৰ ছাঁ পৰাৰ লগতে ক্ষোভৰ জুই জ্বলি উঠিছে। ঘটনা সন্দৰ্ভত অৱগত হোৱাৰ পিছত মোৰাঝাৰ আৰক্ষীয়ে ইতিমধ্যে এটা গোচৰ ৰুজু কৰি ক্ষিপ্ৰতাৰে তদন্ত প্ৰক্ৰিয়া আৰম্ভ কৰিছে। ভুক্তভোগী পৰিয়ালে অভিযুক্ত যুৱকজনৰ কঠোৰ শাস্তিৰ দাবী জনাইছে।