ভাৰতক নিজৰ অস্তিত্বৰ প্রতি ভাবুকি গণ্য কৰে পাকিস্তানে

আমেৰিকাৰ প্ৰতিৰক্ষা বিভাগে বিশ্বজুৰি থকা ভাবুকিসমূহৰ বিষয়ত বার্ষিক মূল্যায়ন কৰি প্ৰকাশ কৰা এখন প্রতিবেদনত কয় যে পাকিস্তানী সেনাই ইয়াৰ সামৰিক বাহিনীক আধুনিকীকৰণ কৰাৰ প্ৰচেষ্টা চলাই যাব। তদুপৰি যুদ্ধ ক্ষেত্ৰত পাৰমাণৱিক অস্ত্ৰ বিকাশৰ দিশতো পাকিস্তানে কার্যসূচী চলাই যাব। 

মার্কিন প্ৰতিৰক্ষাৰ চোৰাংচোৱা সংস্থাই প্ৰকাশ কৰা অনুসৰি পাকিস্তানে ভাৰতক ইয়াৰ অস্তিত্বৰ প্ৰতি ভাবুকি বুলি গণ্য কৰি আহিছে আৰু সেইবাবে ভাৰতৰ বিৰুদ্ধে সামৰিক বাহিনীক সষ্টম কৰাৰ বাবে সেনাক আধুনিকীকৰণৰ প্রচেষ্টা অব্যাহত ৰাখিছে। প্রতিবেদনখনত কোৱা হয় যে পাকিস্তানে ইয়াৰ পাৰমাণৱিক শক্তি আধুনিকীকৰণ কৰাৰ ওপৰতো গুৰুত্ব আৰোপ কৰিছে আৰু ইয়াৰ পাৰমাণৱিক সামগ্ৰী আৰু পাৰমাণৱিক শক্তিৰ নিয়ন্ত্ৰণত গুৰুত্ব বৃদ্ধি কৰিছে। সেইবাবে পাৰমাণৱিক শক্তি বিকাশৰ হেতু দেশখনে বিদেশৰ পৰা সা-সামগ্রী ক্ৰয় কৰাটো অব্যাহত ৰাখিছে। প্রতিবেদনখনত কোৱা হৈছে যে ভাৰতৰ সীমাৰ সিপাৰৰ পৰা দেশখনত আগ্রাসন হ'ব বুলি পাকিস্তানৰ শীর্ষ সামৰিক বিষয়াসকলে এই ক্ষেত্রত সদায় সষ্টম হৈ থাকে। তদুপৰি তেহৰিক-এ-তালিবানে পাকিস্তান আৰু বেলুচ উগ্রপন্থীসকলৰ সৈতে যুঁজ দিয়াৰ বাবেও পাকিস্তানে ব্যৱস্থা গ্রহণ কৰি আছে। 

মার্কিন প্ৰতিৰক্ষা চোৰাংচোৱা সংস্থাটোৱে দাবী কৰে যে আর্থিকভাৱে জৰ্জৰিত দেশখনে চীনৰ পৰা সামৰিক সাহায্য অহৰহ লাভ কৰি আছে। তদুপৰি পাৰমাণৱিক শক্তি আধুনিকীকৰণৰ ক্ষেত্ৰতো চীনৰ পৰা যথেষ্ট সহায় লাভ কৰিছে। চীন হৈছে পাকিস্তানৰ বাবে অর্থনৈতিক আৰু সামৰিক সাহায্যৰ ক্ষেত্ৰত প্ৰধান দেশ। অপাৰেশ্যন সেন্দূৰৰ সময়তো বা পৰৱৰ্তী ভাৰত-পাক সংঘৰ্ষৰ সময়ত চীনে পাকিস্তানৰ সামৰিক বাহিনীক পার্যমানে সহায় আগবঢ়াইছিল। ইতিমধ্যে যোৱা বৰ্ষৰ নৱেম্বৰত দুয়োখন দেশে বিভিন্ন যুটীয়া সামৰিক অনুশীলন চলাইছিল।

উৎসঃ দৈনিক জনমভূমি