ভয়ংকৰ প্ৰতিশোধ! স্বামীৰ প্ৰেমিকাক ৫ গুণ্ডাৰ হতুৱাই গেং ৰেপ কৰোৱালে পত্নীয়ে

আৰক্ষীৰ পৰা লাভ কৰা তথ্য অনুসৰি মহিলাগৰাকীৰ স্বামীয়ে অসামৰিক সেৱাৰ বাবে প্ৰস্তুতি চলাই আছে। মহিলাগৰাকীৰ ৩২ বছৰীয়া স্বামীয়ে কোচিং ইনষ্টিটিউটত চিনাকি হৈছিল যুৱতীগৰাকীৰ সৈতে। ইউ পি এছ পিৰ পৰীক্ষাৰ বাবে দুয়ো একেলগে প্ৰস্তুতি চলাই আছিল। লাহে লাহে মহিলাগৰাকীৰ স্বামী আৰু যুৱতীগৰাকীৰ মাজত মধুৰ সম্পৰ্ক গঢ় লৈ উঠে। যুৱতীগৰাকী কেইবাবাৰো তেওঁলোকৰ ঘৰলৈও আহিছিল আৰু কেইদিনমানৰ পাছতে যুৱতীগৰাকীয়ে তেওঁলোক থকা এপাৰ্টমেণ্টতে ভাড়া কৰি থাকিবলৈ ল’লে। ২০২১ চনৰ অক্টোবৰৰ পৰা ২০২২ চনৰ ফেব্ৰুৱাৰী মাহলৈকে যুৱতীগৰাকী সেই ঘৰটোত আছিল। এই সময়ত মহিলাগৰাকী আৰু যুৱতীগৰাকীৰ মাজত কেইবাবাৰো কাজিয়াও হৈছিল। কাজিয়াৰ বাবে প্ৰেমিকাগৰাকীয়ে ঘৰ খালী কৰি আন ঠাইত থাকিবলৈ যায় যদিও মহিলাগৰাকীৰ স্বামীৰ সৈতে তেওঁৰ সম্পৰ্ক ৰৈ গ’ল। 

এই কথাবোৰত অতীষ্ঠ হৈ ২৬ মে’ত মহিলাগৰাকীয়ে বিবাদ নিষ্পত্তি কৰাৰ কথা কৈ যুৱতীগৰাকীক নিজৰ ঘৰলৈ মাতি আনে। যুৱতীগৰাকীয়ে ভয় খাই তেওঁৰ ঘৰলৈ আত্মীয়ৰ সৈতে আহিছিল যদিও মহিলাগৰাকীয়ে যুৱতীগৰাকীৰ পৰিয়ালৰ লোকক বাহিৰত থাকিবলৈ কয়। দুয়োগৰাকীয়ে ব্যক্তিগতভাৱে কথা পাতিব বুলি পৰিয়ালৰ লোকক জনায় মহিলাগৰাকীয়ে। এই কথা শুনি পৰিয়ালৰ লোকে বাহিৰত ৰৈ যায়। যুৱতীগৰাকীয়ে যেতিয়া ঘৰৰ ভিতৰত প্ৰৱেশ কৰে তেতিয়া তেওঁ দেখিলে যে ইতিমধ্যে পাঁচজন অচিনাকি লোক কোঠাটোত উপস্থিত আছে। 

যুৱতীগৰাকী পলোৱাৰ আগতেই সকলোৱে তেওঁক জপটিয়াই ধৰে। সকলোৱে মিলি যুৱতীগৰাকীক মাটিত পেলায় মুখত কাপোৰ এখন ভৰাই দিয়ে। সকলোৱে প্ৰথমে তেওঁক মাৰপিট কৰিছিল। ইয়াৰ পিছতে চাৰিজন লোকে তেওঁক দলবদ্ধ ধৰ্ষণ কৰে। এই সময়ত মহিলাগৰাকীয়ে ভুক্তভোগী যুৱতীগৰাকীক ধৰি ৰাখিছিল। পঞ্চম অভিযুক্তই ধৰ্ষণ কৰাৰ আগতেই যুৱতীগৰাকীয়ে কেনেবাকৈ চিঞৰিবলৈ সুযোগ পালে। তেওঁৰ চিঞৰ শুনি ঘৰৰ বাহিৰত উপস্থিত থকা পৰিয়ালৰ লোকসকল উপস্থিত হ’ল৷ 

আত্মীয় আহি পোৱাৰ লগে লগে ধৰ্ষণকাৰী কেইটাই পলায়ন কৰে। যুৱতীগৰাকীয়ে ন্যায় বিচাৰি থানাত এজাহাৰ দাখিল কৰে। এজাহাৰ লাভ কৰাৰ পাছতে আৰক্ষীয়ে প্ৰথমে মহিলাগৰাকীক গ্ৰেপ্তাৰ কৰে। তেওঁক জেৰাৰ পৰা লাভ কৰা তথ্যৰ ভিত্তিত আন ৫ জন অভিযুক্তক গ্ৰেপ্তাৰ কৰে আৰক্ষীয়ে। ঘটনাটো তেলেংগানাৰ ৰাজধানী হায়দৰাবাদৰ গাচিবৌলিৰ। ঘটনাটোক লৈ সমগ্ৰ অঞ্চলটোতে তীব্ৰ চাঞ্চল্য বিৰাজ কৰিছে।