ডিজিটেল ডেস্কঃ যান্ত্ৰিক বিজুতি নহয়, ইচ্ছাকৃতভাৱে দুৰ্ঘটনাগ্ৰস্ত হৈছিল চীনা যাত্ৰীবাহী বিমানখন। উদ্ধাৰ হোৱা বিমানখনৰ ব্লেক বক্সটোৱে একেখিনি কথাকে সূচাইছে বুলি দাবী তদন্তকাৰী সংস্থাৰ। স্মৰ্তব্য যে, বিগত মাৰ্চ মাহত চীন ইষ্টাৰ্ণ এয়াৰলাইন্সৰ বয়িং ৭৩৭-৮০০ বিমানখন কুনমিঙৰ পৰা গুৱাংঝৌলৈ উৰা মাৰিছিল। বিমানখনত ১৩২ গৰাকী যাত্ৰী আছিল। ২৯ হাজাৰ ফুট উচ্চতাৰ পৰা গুৱাংছিৰ পাহাৰত খুন্দা মাৰে বিমানখনে। ফ্লাইট ৰাডাৰ-২৪ ৰ তথ্য অনুসৰি দুৰ্ঘটনাৰ সময়ত বিমানখনৰ গতিবেগ আছিল ঘণ্টাত ১১০০ কিলোমিটাৰ। এই দুৰ্ঘটনাৰ ফলত বিমানখনৰ সকলো যাত্ৰীৰ মৃত্যু হোৱা বুলি জানিবলৈ পোৱা গৈছে।
প্ৰাথমিক অৱস্থাত যান্ত্ৰিক বিজুতিৰ বাবেই এই দুৰ্ঘটনা সংঘটিত হোৱা বুলি ধাৰণা কৰি লোৱা হৈছিল। কিন্তু তদন্তকাৰী দলে ব্লেক বক্স পৰীক্ষা কৰি দাবী কৰে যে, কোনোবাই ইচ্ছাকৃতভাৱে দুৰ্ঘটনাটো সংঘটিত কৰিছে। দুৰ্ঘটনা সংঘটিত হোৱা দিনটোত এয়াৰ ট্ৰেফিক কণ্ট্ৰ’লে পাইলটসকলৰ সৈতে যোগাযোগৰ চেষ্টা চলাইছিল যদিও কোনো সঁহাৰি পোৱা নাছিল বুলি জনাইছে। বিমানৰ পৰা কোনো আগতীয়া সংকেতো প্ৰেৰণ কৰা হোৱা নাছিল। তদন্তকাৰী দলে কোৱা মতে, বিমানৰ ককপিট কোনোবাই অচিনাকী ব্যক্তিয়ে দখল কৰিছিল।
ইফালে চাইনা ইষ্টাৰ্ণ এয়াৰলাইন্সৰ মতে, পাইলট আৰু কো-পাইলট দুয়োজনেই সুস্থ আছিল আৰু তেওঁৰ কোনো পৰিয়াল বা আৰ্থিক সমস্যা নাছিল। তেন্তে বিমানখন কোনে দুৰ্ঘটনাগ্ৰস্ত কৰিলে সেয়া হৈ পৰিছে এক গভীৰ ৰহস্য।
Continue Reading
