ডিজিটেল ডেস্ক : পাৰমাণৱিক চুক্তিৰ সন্দৰ্ভত আমেৰিকাৰ ৰাষ্ট্ৰপতি ড'নাল্ড ট্রাম্পে ইৰানৰ সৈতে পোনপটীয়াকৈ এখন বৈঠক অনুষ্ঠিত কৰাৰ বাবে দাবী জনাইছিল। কিন্তু ইৰানে ৰাষ্ট্ৰপতি ট্রাম্পৰ এই দাবী পোনছাটেই নাকচ কৰে আৰু দেওবাৰে পুনৰ কয় যে তেওঁলোকে ওমানৰ জৰিয়তে পৰোক্ষভাৱেহে আমেৰিকাৰ লগত আলোচনাত বহিব।
উল্লেখযোগ্য যে ইৰানে পাৰমাণৱিক চুক্তি নকৰিলে আমেৰিকাই দেশখনত প্রচণ্ড বোমাবর্ষণ কৰিব বুলি ট্রাম্পে ভাবুকি দিছিল আৰু শেহতীয়াকৈ ইৰানৰ সমীপৰ ভাৰত মহাসাগৰৰ দ্বীপ ডিয়েগ' গাছিয়াত ছখনকৈ শক্তিশালী বি-২ যুদ্ধ বিমান মোতায়েন কৰিছিল। ইৰানৰ এজন জ্যেষ্ঠ চৰকাৰী বিষয়াই শনিবাৰে কয় যে পৰোক্ষ আলোচনাৰ প্ৰস্তাৱটোৰ পৰা ইৰানৰ সৈতে এটা ৰাজনৈতিক সমস্যা সমাধানৰ ক্ষেত্ৰত আমেৰিকাৰ সদ্ভাৱ প্ৰকাশ পাব।
ইফালে, আমেৰিকাৰ ভাবুকিৰ সন্দৰ্ভত ইৰানে ইৰাক, কুৱেইট, ইউ এ ই, কাটাৰ, তুৰস্ক আৰু বাহৰেইনলৈও জাননী প্ৰেৰণ কৰে, যাতে তেওঁলোকে মার্কিন আক্রমণক সমর্থন নজনায়। আক্ৰমণৰ সময়ত যদি এই দেশসমূহে মার্কিন সেনাক আকাশী পথো ব্যৱহাৰ কৰিবলৈ দিয়ে, তেনেহ'লে দেশকেইখনৰ পৰিনাম বিষম হ'ব বুলি ইৰানে সকীয়াই দিয়ে। আনহাতে, আমেৰিকাৰ সম্ভাব্য আক্ৰমণৰ প্ৰতি লক্ষ্য ৰাখি ইৰানৰ সৰ্বোচ্চ নেতা আয়াতুল্লা খামেনেই দেশখনৰ সেনাক উচ্চ সতর্কতা অৱলম্বন কৰি যুদ্ধৰ বাবে সষ্টম হ'বলৈ নির্দেশ দিয়ে।
উৎসঃ দৈনিক জনমভূমি
Continue Reading
