ডিজিটেল ডেস্কঃ টি-২০ ক্রিকেটত আন এক মাইলৰ খুঁটি স্পর্শ কৰিলে বিৰাট কোহলীয়ে। সোমবাৰে আই পি এলৰ এখন খেলত মুম্বাই ইণ্ডিয়ানছৰ বিৰুদ্ধে ২০ অ'ভাৰৰ ক্রিকেটত ১৩,০০০ ৰান পূর্ণ কৰিলে কোহলীয়ে। বিশ্বৰ দ্বিতীয় দ্রুততম বেটাৰ হিচাপে এই কীর্তি অর্জন কৰিলে তাৰকা বেটাৰগৰাকীয়ে।
সোমবাৰে খেলৰ আগেয়ে সেই অভিলেখ গঢ়িবলৈ কোহলীক প্রয়োজন আছিল মাথোঁ ১৭ ৰান। হার্দিক পাণ্ডিয়াৰ দল মুম্বাইৰ বিৰুদ্ধে কোহলীয়ে ৪২টা বলত ৬৭ ৰানৰ ইনিংছ খেলে।
ইয়াৰ জৰিয়তে টি-২০ ক্রিকেটত কোহলীৰ ৰানৰ সংখ্যা হয়গৈ ১৩,০০০। বিশ্বৰ পঞ্চম ক্রিকেটাৰ হিচাপে তেওঁ এই অভিলেখ গঢ়ে। ক্রিছ গেইলৰ পাছত দ্বিতীয় দ্রুততম হিচাপে টি-২০ত ১৩,০০০ ৰানৰ ক্লাবত প্রৱেশ কৰে। তেওঁলোক দুগৰাকীৰ উপৰি এলেক্স হেলছ, শ্বোৱেইব মালিক আৰু কাইৰন পোলার্ডৰ নামত আছে ১৩,০০০ ৰান সংগ্ৰহৰ ৰেকৰ্ড।
দ্রুততম ১৩,০০০ ৰান গোটোৱাৰ অভিলেখ প্রতিষ্ঠা কৰি থৈছে গেইলে। বেষ্ট ইণ্ডিজৰ প্রাক্তন তাৰকা বেটাৰ গেইলে ৩৮১সংখ্যক ইনিংছত এই মাইল ফলক অর্জন কৰে। কোহলীয়ে ৩৮৬সংখ্যক ইনিংছত উক্ত ৰেকৰ্ডৰ অধিকাৰী হয়।
উৎস- দৈনিক জনমভূমি
Continue Reading
