ডিজিটেল ডেস্ক : পূৰ্বে ধাৰণা কৰাতকৈ হ্ৰাস পাব ভাৰতৰ জিডিপিৰ বিকাশ। ২০২২ চনত ভাৰতৰ জিডিপিৰ বিকাশৰ হাৰ ৬.৪শতাংশ হ’ব বুলি ধাৰণা কৰা হৈছে। পূৰ্বে ভাৰতৰ জিডিপিৰ বিকাশৰ হাৰ ৮.৮ শতাংশ হ’ব বুলি পূৰ্বানুমান কৰা হৈছিল। কিন্তু শেহতীয়াকৈ এই হাৰ হ্ৰাস পাব বুলি ধাৰণা কৰা হৈছে। ৰাষ্ট্ৰসংঘৰ প্ৰতিবেদনতে এই তথ্য প্ৰকাশ পাইছে। জিডিপিৰ বিকাশত ৰাছিয়া ইউক্ৰেইনৰ যুদ্ধই গোলকীয়ভাৱে প্ৰভাৱ পেলোৱাৰ পৰিপ্ৰেক্ষিতত ভাৰতো প্ৰভাৱিত হোৱাৰ কথা এই প্ৰতিবেদনত প্ৰকাশ কৰা হৈছে। অৱশ্যে, তাৰ পাছতো বিশ্বৰ ভিতৰতে ভাৰতৰ অৰ্থনৈতিক বিকাশৰ হাৰ দ্ৰুততম হৈ থাকিব বুলি কোৱা হৈছে।
ৰাষ্ট্ৰসংঘৰ ডিপাৰ্টেমেণ্ট অব ইক’নমিক এণ্ড ছ’চিয়েল এফেয়াৰ্ছৰ ৱৰ্ল্ড ইক’নমিক ছিটুৱেচন এণ্ড প্ৰছপেক্টছ (ডব্লিউ ই এছ পি)ৰ প্ৰতিবেদন বুধবাৰে প্ৰকাশ পায়। এই প্ৰতিবেদনত ভালেমান উদ্বেগজনক তথ্য প্ৰকাশ কৰিছে। এই প্ৰতিবেদন অনুসৰি ৰাছিয়া ইউক্ৰেইনৰ যুদ্ধই মহামাৰীৰ সময়ত ভংগুৰ ৰূপ লোৱা বিশ্ব অৰ্থনীতিৰ ওপৰত অধিক ক্ষয়ংকৰ প্ৰভাৱ পেলাইছে। বিশেষকৈ ইউৰোপত এক বিধ্বংসী মানৱীয় সংকট সৃষ্টিৰ আশংকা সৃষ্টি কৰিছে। খাদ্য আৰু অত্যাৱশ্যকীয় সামগ্ৰীৰ ব্যাপক মূল্যবৃদ্ধিৰ আশংকা কৰা হৈছে সমগ্ৰ ইউৰোপতে। কেৱল ইউৰোপতে নহয়, সমগ্ৰ বিশ্বতে মুদ্ৰাস্ফীতিয়ে এক অভূতপূৰ্ব ৰূপ ধাৰণ কৰাৰ আশংকা সৃষ্টি হৈছে।
তাৎপৰ্যপূৰ্ণভাৱে ২০২২ চনত গোলকীয় অৰ্থনীতিৰ বিকাশৰ হাৰ ৩.১ শতাংশ হোৱাৰ পূৰ্বানুমান কৰা হৈছে। এই বছৰৰ জানুৱাৰী মাহত অৰ্থনৈতিক বিকাশৰ এই হাৰ ৪ শতাংশ হ’ব বুলি ধাৰণা কৰা হৈছিল যদিও সেই হাৰ হ্ৰাস হোৱাৰ আশংকা কৰা হৈছে। আনহাতো গোলকীয় মুদ্ৰাস্ফীতিৰ বাৰ ৬.৭শতাংশলৈ বৃদ্ধিৰ পূৰ্বানুমান কৰা হৈছে। ২০১০-২০২০ চনৰ সময়ছোৱাত এই হাৰ আছিল ২.৯ শতাংশ। অৰ্থাৎ এতিয়া এই হাৰ বৃদ্ধি পাইছে দুগুণতকৈও অধিক হাৰত। খাদ্যসামগ্ৰী আৰু ইন্ধনৰ দামবৃদ্ধিয়ে এইক্ষেত্ৰত ব্যাপক প্ৰভাৱ বিস্তাৰ কৰাৰ আশংকা কৰা হৈছে। এই প্ৰতিবেদন অনুসৰি শেহতীয়া কেইটামান মাহত দক্ষিণ এছিয়াৰ পৰিস্থিতিৰঅ অৱনতি ঘটিছে।
Continue Reading
