ইজৰাইলৰ সামৰিক ঘাটিত ইৰানৰ আক্ৰমণ

ডিজিটেল ডেস্ক : ইৰানে শুকুৰবাৰে সন্ধিয়া ইজৰাইলৰ টেল আভিভ, বীৰশ্বেৱা, হাইফাকে ধৰি কেইবাখনো মহানগৰত পুনৰ মিছাইলেৰে আক্ৰমণ কৰে।

সংবাদ প্রতিষ্ঠানৰ বাতৰি মতে, এই আক্রমণত হাইফাত ১৬ বছৰীয়া এগৰাকী নাবালককে ধৰি ২৩জন লোক আহত হয়। ইজৰাইলী প্ৰতিৰক্ষা বাহিনীৰ মতে, ইৰানে শুকুৰবাৰৰ সন্ধিয়াৰ আক্ৰমণত ২৫টা মিছাইল নিক্ষেপ কৰে। ইফালে ইৰানৰ সেনাই শুকুৰবাৰে কয় যে তেওঁলোকে ইজৰাইলত কৰা এই আক্ৰমণত সামৰিক প্রতিষ্ঠান, সামৰিক উদ্যোগ, কমাণ্ড এণ্ড কণ্ট্ৰল চেণ্টাৰক লক্ষ্য কৰি লৈছিল।

শুকুৰবাৰে পুৱা ইৰানে ইজৰাইলৰ বীৰশ্বেৱা মহানগৰত মাইক্ৰ'ছফ্টৰ কাৰ্যালয়ৰ সমীপত বেলিষ্টিক মিছাইলেৰে আক্ৰমণ কৰিছিল। এই আক্রমণত কেইবাখনো গাড়ীত জুই লগাৰ উপৰি আশে-পাশে থকা ভৱনৰ ক্ষতি হৈছিল। তদুপৰি এই আক্রমণত ৭জন লোক সামান্য পৰিমাণে আহত হয়।

উৎসঃ দৈনিক জনমভূমি