ৰঙালীৰ ৰঙৰ মাজতে অঘটন

ডিজিটেল ডেস্কঃ কাছাৰ জিলাৰ কালাইন অঞ্চলৰ ছলিগ্ৰামত নদীত গা ধুবলৈ নামি নিখোঁজ হোৱা এজন যুৱকৰ মৃতদেহ উদ্ধাৰ হোৱাৰ পাছত সমগ্ৰ অঞ্চলত শোকৰ পৰিৱেশ সৃষ্টি হৈছে। 

মৃত কিৰণ গোৱালা স্থানীয় বাসিন্দা বাহাদুৰ গোৱালাৰ পুত্ৰ। জানিব পৰা মতে, সদায়ৰ দৰে গা ধুবলৈ নদীত গৈছিল যদিও বহু সময় ধৰি ঘৰলৈ উভতি নাহিবলৈ পৰিয়ালৰ চিন্তা বৃদ্ধি পায়। পিছত নদীৰ পাৰত তেওঁৰ চাবোন, চেণ্ডেল আৰু কাপোৰ পৰি থকা দেখা পোৱাৰ লগে লগে সন্দেহ অধিক বৃদ্ধি পায়। 

গাঁওবাসীয়ে সন্ধান অভিযান আৰম্ভ কৰাৰ পিছত অৱশেষত এজন আত্মীয়ই তেওঁৰ মৃতদেহ দেখা পায়। মৃতদেহ উদ্ধাৰ কৰি আৰক্ষীক খবৰ দিয়া হয়। আৰক্ষীয়ে ঘটনাস্থলীত উপস্থিত হৈ আইনগত প্ৰক্ৰিয়া সম্পন্ন কৰি মৃতদেহটো মৰণোত্তৰ পৰীক্ষাৰ বাবে শিলচৰ মেডিকেল কলেজ আৰু হাস্পতাললৈ প্ৰেৰণ কৰে। এইফালে, দুৰ্যোগৰ সময়ত মানৱিকতাৰ উদাহৰণ দাঙি ধৰি বিজেপিৰ বিধায়ক প্ৰাৰ্থী কমলাক্ষ দে পুৰকায়স্থে ‘স্বৰ্গৰথ’ প্ৰেৰণ কৰি মৃতদেহ পৰিবহণত সহায় কৰে। এই মৰ্মান্তিক ঘটনাত ছলিগ্ৰাম সহ আশপাশৰ অঞ্চলত গভীৰ শোকৰ ছাঁ নামি আহিছে।