অসমৰ বানপীড়িতক সহায় কৰক; দেশবাসীলৈ আহ্বান বলীউড অভিনেত্ৰী ভূমি পেডনেকাৰৰ

ডিজিটেল ডেস্ক: অসমৰ ভয়ংকৰ বান পৰিস্থিতিয়ে দেশৰ বিভিন্ন প্ৰান্তৰ মানুহক চিন্তিত কৰি তুলিছে। এই জটিল সময়ত ৰাজ্যখনৰ বানপীড়িত লোকসকলক সহায়ৰ হাত আগবঢ়াবলৈ বলীউডৰ জনপ্ৰিয় অভিনেত্ৰী ভূমি পেডনেকাৰে সমগ্ৰ দেশবাসীক আহ্বান জনাইছে। তেওঁ নিজৰ ইনষ্টাগ্ৰাম ভিডিঅ’ৰ জৰিয়তে অসমৰ বৰ্তমানৰ শোচনীয় ছবিখন দাঙি ধৰি দেশৰ নাগৰিকসকলক একত্ৰিত হৈ সহায়ৰ বাবে আগবাঢ়ি আহিবলৈ অনুৰোধ জনাইছে।

প্ৰাপ্ত তথ্য অনুসৰি, যোৱা ২৪ জুলাই পৰ্যন্ত অসমত বান পৰিস্থিতি অতি সংকটজনক হৈ আছে। ৰাজ্যখনৰ মুঠ ১১ খন জিলাত ৭.২১ লাখতকৈ অধিক লোক বানৰ ফলত ক্ষতিগ্ৰস্ত হৈছে। ইয়াৰ উপৰিও, ৰাজ্যৰ পাঁচখন মুখ্য নদী বিপদসীমাৰ ওপৰেৰে বৈ থকাৰ ফলত পৰিস্থিতি অধিক ভয়াৱহ হৈ পৰিছে আৰু মানৱীয় সংকট গভীৰ হৈ আহিছে।

অভিনেত্ৰী পেডনেকাৰে তেওঁৰ ভিডিঅ’ বাৰ্তাত বানৰ ব্যাপকতাৰ বিষয়ে উল্লেখ কৰি কয় যে লাখ লাখ লোক স্থানান্তৰিত হ’বলৈ বাধ্য হৈছে, বহু প্ৰাণ হেৰুৱাইছে আৰু বহু গাঁও সম্পূৰ্ণৰূপে উটি গৈছে। তেওঁ লগতে কয় যে ৪০ জনতকৈ অধিক লোকে প্ৰাণ হেৰুৱাইছে আৰু এই সংখ্যা ক্ৰমাগতভাৱে বৃদ্ধি পাইছে। বানপানীৰ ফলত ঘৰ-দুৱাৰ, পশুধন আদি সকলো উটি গৈছে আৰু বানাক্ৰান্ত লোকসকলে সৰ্বস্বান্ত হৈছে বুলিও তেওঁ আক্ষেপ প্ৰকাশ কৰে।

ভূমি পেডনেকাৰে এইটোও ব্যক্ত কৰে যে অসমৰ এই ভয়াৱহ পৰিস্থিতিৰ বিষয়ে খুব কম সংখ্যক লোকেই আলোচনা কৰিছে, কিন্তু তেওঁৰ সম্পূৰ্ণ বিশ্বাস আছে যে যোৱা বছৰৰ দৰেই এইবাৰো সমগ্ৰ দেশ অসমৰ কাষত থিয় দিব। তেওঁ দেশৰ নাগৰিকসকলক আগবাঢ়ি আহি এই দুৰ্যোগৰ সময়ত অসমৰ জনসাধাৰণক সহায় কৰিবলৈ পুনৰবাৰ আহ্বান জনায়।