ডিজিটেল ডেস্কঃ চলিত বিশ্বকাপত বাংলাদেশৰ ধাৰাবাহিকভাৱে সফল বেটছমেন তেওঁ। সেই মাহমুদুল্লাই বিশ্বকাপৰ মাজত অৱসৰৰ ইংগিত দিছে। বিশ্বকাপত দলৰ হৈ সুন্দৰ প্ৰদৰ্শন কৰিছে ৩৭ বছৰীয়া মাহমুদুল্লাই। দক্ষিণ আফ্ৰিকাৰ বিৰুদ্ধে শতকো অৰ্জন কৰে।
ফৰ্মত থাকি ক্ৰিকেটক বিদায় দিয়াৰ সিদ্ধান্ত লৈছে মাহমুদুল্লাই। বিশ্বকাপৰ মাজতে অৱসৰৰ কথা কৈছে ছাকিব আল হাছানৰ দলৰ প্ৰবীণ বেটছমেনগৰাকীয়ে। আন্তঃৰাষ্ট্ৰীয় ক্ৰিকেট পৰিষদক দিয়া এক সাক্ষাৎকাৰত মাহমুদুল্লাই কয়- ''২০০৭ চনত মোৰ অভিষেক। বহুদিন ধৰি আন্তঃৰাষ্ট্ৰীয় ক্ৰিকেট খেলি আহিছো। মোৰ ভাগ্য ভাল আছিল যে বিশ্বকাপত দুটামান শতক অৰ্জন কৰিবলৈ সক্ষম হৈছিলো।’’
তেওঁ কয়- ক্ৰিকেট এনেকুৱা খেল যিয়ে সদায় আচৰিত কৰি তোলে। এইবাৰ বিশ্বকাপ খেলিবলৈ বহুত কষ্ট কৰিলোঁ। সুযোগৰ বাবে ভগৱানক ধন্যবাদ জনাইছো। মই সদায় দেশৰ বাবে যৎপৰোনাস্তি দিবলৈ চেষ্টা কৰো।’’
১৬ বছৰীয়া আন্তঃৰাষ্ট্ৰীয় ক্ৰিকেট কেৰিয়াৰৰ অন্তত মাহমুদুল্লাই দাড়ি টানিবলৈ চিন্তা কৰিছে। অৱশ্যে কেতিয়া অৱসৰ ল’ব সেই কথা তেওঁ কোৱা নাই। ৩৭ বছৰীয়া বেটছমেনগৰাকীয়ে কয়, ''সঁচা কথা ক’বলৈ গ’লে মোৰ শেষৰটো বিশ্বকাপ খেলিছো। মই কিমান দিন বাংলাদেশৰ হৈ খেলিম সেয়া নিৰ্ভৰ কৰিব মই কিমান ফিট হ’ব পাৰো আৰু কেনেকৈ প্ৰদৰ্শন কৰিব পাৰো তাৰ ওপৰত। হয়তো কেইদিনমানৰ পিছত বা অতি সোনকালে আন্তঃৰাষ্ট্ৰীয় ক্ৰিকেটৰ পৰা বিদায় লম।''
Continue Reading
