ডিজিটেল ডেস্ক: সামাজিক মাধ্যম যোগে মুখ্যমন্ত্ৰীক হত্যাৰ ভাবুকি দিয়া ঘটনাক লৈ সৰৱ কাছাৰৰ বিজেপি বিধায়ক কমলাক্ষ দে পুৰকায়স্থ। মুখ্যমন্ত্ৰীক হত্যাৰ ভাবুকি দিয়াৰ সন্দৰ্ভত বিস্ফোৰক মন্তব্য কৰিছে কাছাৰৰ কাটিগড়া সমষ্টিৰ বিজেপি বিধায়ক কমলাক্ষ দে’ পুৰকায়স্থই। বিধায়কগৰাকীয়ে সন্দেহ প্ৰকাশ কৰি কয় যে মুখ্যমন্ত্ৰীক হত্যাৰ ভাবুকি দিয়া লোকসকলৰ পাকিস্তান আৰু ISIৰ সৈতে সম্পৰ্ক থাকিব পাৰে।
স্বাধীনতা দিৱসৰ দিনাৰ পৰা সামাজিক মাধ্যমত একাংশ লোকে মুখ্যমন্ত্ৰীক হত্যাৰ ভাবুকি দি বিভিন্ন পোষ্ট কৰাৰ অভিযোগ উত্থাপিত হৈছে। ইতিমধ্যে ঘটনাটোৰ সৈতে জড়িত থকাৰ সন্দেহত অসম আৰক্ষীয়ে কেইবাজনো লোকক গ্ৰেপ্তাৰ কৰিছে।
এই ঘটনাক লৈ প্ৰতিক্ৰিয়া প্ৰকাশ কৰি বিধায়ক কমলাক্ষ দে পুৰকায়স্থই কয় যে ‘‘মুখ্যমন্ত্ৰীক হত্যাৰ ভাবুকি দিয়াসকলে পাকিস্তান, বাংলাদেশ আৰু ISIৰ পৰা সাহস পাই আছে। যাৰবাবে তেওঁলোকে মুখ্যমন্ত্ৰী হত্যাৰ এনে ভাবুকি দি আছে।’’
বিধায়ক পুৰকায়স্থই লগতে কয়, ‘‘যিসকলে মুখ্যমন্ত্ৰীক হত্যাৰ ভাবুকি দি আছে, সেইসকলে ভাৰতবৰ্ষক ধ্বংস কৰাৰ লগতে দেশৰ কৃষ্টিসংস্কৃতিক আৰু ঐতিহ্যক বিনষ্ট কৰাৰ চেষ্টা চলাইছে। এনে দেশদ্ৰোহী লোকৰ বিৰুদ্ধে কোনো ধৰণৰ শিথিলতা নেদেখুৱাই কঠোৰতম আইনগত ব্যৱস্থা গ্ৰহণ কৰিব লাগে৷’’
Continue Reading
