বৰপেটাৰোড আৰক্ষীৰ বৃহৎ সফলতা; গুৱাহাটীৰ পৰা গ্ৰেপ্তাৰ কুখ্যাত চাইবাৰ প্ৰৱঞ্চক জাহিদুল ইছলামক

ডিজিটেল ডেস্ক: চাইবাৰ অপৰাধৰ বিৰুদ্ধে বৰপেটাৰোড আৰক্ষীয়ে অব্যাহত ৰখা তীব্ৰ অভিযানৰ মাজতে এক বৃহৎ সফলতা লাভ কৰিছে। আৰক্ষীয়ে গুৱাহাটীৰ পৰা গ্ৰেপ্তাৰ কৰিবলৈ সক্ষম হৈছে এজন কুখ্যাত চাইবাৰ অপৰাধীক। ধৃত প্ৰৱঞ্চকজনক হাউলীৰ বগাইজান পাৰাৰ জাহিদুল ইছলাম বুলি চিনাক্ত কৰা হৈছে।

আৰক্ষীৰ সূত্ৰই প্ৰকাশ কৰা অনুসৰি, জাহিদুল ইছলামে দীৰ্ঘদিন ধৰি বৰপেটাৰোড আৰু ইয়াৰ আশে-পাশে থকা অঞ্চলৰ সহজ-সৰল লোকসকলক লক্ষ্য কৰি লৈছিল। অতি কৌশলেৰে লোকসকলৰ ক্ৰেডিট কাৰ্ডৰ গোপন তথ্য সংগ্ৰহ কৰি একাউণ্টৰ পৰা ধন লুটি অঞ্চলটোত এক আতংকৰ সৃষ্টি কৰিছিল এই প্ৰৱঞ্চকজনে।

ইটোৰ পিছত সিটো চাইবাৰ অপৰাধ সংঘটিত কৰি আৰক্ষীৰ চকুত ধূলি দিবলৈ জাহিদুলে বিগত কিছুদিন ধৰি গুৱাহাটীত আত্মগোপন কৰি আছিল।

বৰপেটাৰোড আৰক্ষীয়ে এক বিশেষ গোপন সূত্ৰৰ পম খেদি গুৱাহাটীত এক আকস্মিক অভিযান চলায়। এই অভিযানকালতে আত্মগোপন কৰি থকা অৱস্থাৰ পৰাই আৰক্ষীয়ে জাহিদুলক কৰায়ত্ত কৰিবলৈ সক্ষম হয়।

বৰপেটাৰোড আৰক্ষীৰ এই সফলতাক এতিয়া ভুক্তভোগী ৰাইজে প্ৰশংসা কৰাৰ লগতে অঞ্চলটোত চাইবাৰ অপৰাধীৰ বিৰুদ্ধে এনে অভিযান অব্যাহত ৰাখিবলৈ দাবী জনাইছে।