ডিজিটেল ডেস্কঃ বিয়াৰ পিছদিনাই দৰাক লুটা তিনিজনী কইনাক গ্ৰেপ্তাৰ কৰিছে আৰক্ষীয়ে। তেওঁলোকে ক্ষীৰত মাদক দ্ৰব্য মিহলাই খুৱায় দৰাক, দৰাৰ নিচা লাগি টোপনি যোৱাৰ পাছত সকলোখিনি লুটি লৈ পলায় যায়।
উত্তৰ প্ৰদেশৰ হৰদয়ত তিনি ডকাইত কইনাক গ্ৰেপ্তাৰ কৰিছে আৰক্ষীয়ে। বিয়াৰ পিছদিনাই দৰাক নিচাযুক্ত ক্ষীৰ খুৱাই লুটি লৈ যোৱাই তেওঁলোকৰ মূল লক্ষ্য। এই মহিলাসকলে এই পৰ্যন্ত ১৩ জন দৰাক প্ৰবঞ্চনা কৰিছে। ধৃত মহিলাসকলৰ ভিতৰত আছে পূজা ওৰফে সোণম, আশা ওৰফে গুড্ডি আৰু সুনীতা। আৰক্ষীৰ মতে এই মহিলাসকলে সেই যুৱক আৰু পৰিয়ালক লক্ষ্য কৰি লৈছিল, যিসকলে যথেষ্ট বয়সৰ পাছতো বিবাহপাশত আবদ্ধ হ’ব পৰা নাছিল।
আৰক্ষীয়ে জনোৱা মতে, প্ৰথমে তেওঁলোকে নিচাযুক্ত ক্ষীৰ খুৱাই দৰাক অচেতন কৰে তাৰপাছত তেওঁলোকৰ গহনা আৰু নগদ ধন লুটি লৈ যায়। আৰক্ষীয়ে এই মহিলাসকলৰ পৰা লুণ্ঠন কৰা গহনা আৰু নগদ ধনো উদ্ধাৰ কৰিছে।
সমগ্ৰ বিষয়টোত অভিযুক্ত ডকাইত কইনাক জেৰা কৰি আছে আৰক্ষীয়ে। এতিয়ালৈকে জেৰাৰ সময়ত এইটোও পোহৰলৈ আহিছে যে তেওঁলোকৰ নেটৱৰ্ক হিন্দী বলয়ৰ বহু ৰাজ্যত বিয়পি আছে। বিষয়টোৰ তদন্ত অব্যাহত আছে। তদন্তৰ অন্তত অধিক ব্যৱস্থা গ্ৰহণ কৰা হ’ব।
Continue Reading
