ধনে পাহৰায় তাৰকাৰ দায়বদ্ধতা! গোচৰ ৰুজু অমিতাভ, অজয়, ৰণবীৰ, শ্বাহৰুখৰ বিৰু্দ্ধে, কি হ’ব পৰিণতি?

ডিজিটেল ডেস্ক : বলীউডৰ কিংবদন্তী অভিনেতা অমিতাভ বচ্চন, অজয় দেৱগন, শ্বাহৰুখ খান আৰু ৰণবীৰ সিঙৰ বিৰুদ্ধে দাখিল হ’ল এজাহাৰ। দেশৰ অগণিত লোকৰ আদৰ্শ হিচাপে চিহ্নিত হৈ অহা তাৰকা শিল্পীকেইগৰাকীৰ বিৰুদ্ধে এজাহাৰ দাখিল কৰা কাৰ্যক লৈ এতিয়া ব্যাপক চৰ্চা চলিছে। সামাজিক দায়বদ্ধতাৰ ফালে পিঠি দিয়াৰ অভিযোগেৰেই এই অভিযোগ দাখিল হোৱা বুলি জানিব পৰা গৈছে।

এই আটাইকেইগৰাকী তাৰকা অভিনেতাই আচলতে ভাগ লৈ আহিছে স্বাস্থ্যৰ বাবে অতি হানিকাৰক বুলি বিবেচনা কৰা পাণ মচলাৰ বিজ্ঞাপনত। পান মচলাৰ বিজ্ঞাপনত ভাগ লৈ সমাজক বিপথে পৰিচালিত কৰাৰ অভিযোগতে চাৰিওজনৰ বিৰুদ্ধে এই এজাহাৰ দাখিল কৰা হৈছে। তাৰকা অভিনেতাকেইগৰাকীৰ বিৰু্দ্ধে এই অভিযোগ দাখিল কৰা হৈছে বিহাৰৰ মুজাফ্ফৰপুৰত। এগৰাকী সমাজকৰ্মীয়ে তাৰকাকেইগৰাকীৰ বিৰুদ্ধে এই গোচৰ ৰুজু কৰিছে। সমাজকৰ্মী তামান্না হাছমীয়ে ৰণবীৰ সিং, অজয় দেৱগান, শ্বাহৰুখ খান আৰু অমিতাভ বচ্চনৰ বিৰুদ্ধে ৪৬৭, ৪৬৮, ৪৩৯ আৰু ১২০ বি ধাৰাৰ অধীনত গোচৰ ৰুজু কৰিছে। একে সময়তে, অভিযোগপত্ৰখনত এই চাৰিজন তাৰকাক ধনৰ লোভত তেওঁলোকৰ ষ্টাৰডমৰ অপব্যৱহাৰ কৰাৰো অভিযোগ উত্থাপন কৰা হৈছে। এক প্ৰতিবেদন অনুসৰি, গোচৰটোৰ শুনানি ২৭ মে'ত হ'ব। 

অভিযোগকাৰী তামান্নাই সদৰি কৰে যে, এই তাৰকাসকলে তেওঁলোকৰ জনপ্ৰিয়তাক দায়িত্বহীনভাৱে ব্যৱহাৰ কৰিছে। এই লোকসকলক শিশুৰ পৰা বৃদ্ধলৈকে সকলোৱে তেওঁলোকৰ আদৰ্শ হিচাপে গণ্য কৰে। এনে পৰিস্থিতিত, এই লোকসকলে এই তাৰকাসকলে কৰা কামবোৰ অনুসৰণ কৰে। এনে পৰিস্থিতিত, তাৰকাসকলৰ এনে বিজ্ঞাপনে তেওঁলোকৰ ওপৰত অবাঞ্চিত প্ৰভাৱ পেলাব পাৰে।

উল্লেখ্য যে, অমিতাভ বচ্চনে তেওঁৰ জন্মদিনত এটা বিবৃতি জাৰি কৰিছিল যে তেওঁ পাণ মচলাৰ কোম্পানীৰ সৈতে তেওঁৰ বিজ্ঞাপনৰ চুক্তি বাতিল কৰিছে। তেওঁ কৈছিল যে কমলা পচন্দ নামৰ ব্ৰেণ্ডটোৰ বিজ্ঞাপন সম্প্ৰচাৰ হোৱাৰ কেইদিনমান পাছতে তেওঁ কোম্পানীটোৰ সৈতে কথা পাতিছিল আৰু বিজ্ঞাপনটোৰ সৈতে চুক্তি বাতিল কৰিছিল আৰু তেওঁ লাভ কৰা মাচুলও ঘূৰাই দিছিল। কেৱল অমিতাভেই নহয়, আন এগৰাকী তাৰকা অবিনেতা অক্ষয় কুমাৰো পাণ মচলাৰ বিজ্ঞাপন কৰাৰ বাবে বিতৰ্কৰ সাঙোৰ খাই পৰিছিল।