ডিজিটেল ডেস্কঃ মঙলবাৰে পুৱতি নিশা বৰেলীৰ ফাতেহগঞ্জ পূৱ থানা এলেকাত সংঘটিত হয় এক অদ্ভুত কাণ্ড, য’ত লক্ষ্ণৌ-দিল্লী ৰাষ্ট্ৰীয় ঘাইপথত ডিভাইডাৰত খুন্দা মাৰে এখন গাড়ীয়ে।
এই ঘটনাই এটা ডাঙৰ বন্যপ্ৰাণী সৰবৰাহৰ নেটৱৰ্কৰ কথা পোহৰলৈ আনিলে৷ দুৰ্ঘটনা সংঘটিত হোৱাৰ লগে লগে গাড়ীখনত থকা লোক দুজনে সেই স্থানৰ পৰা পলায়ন কৰে যদিও তাত উপস্থিত থকা লোকসকলে দেখা এক দৃশ্যই সকলোকে স্তম্ভিত কৰি তুলিলে।
স্থানীয় ৰাইজ আৰু আৰক্ষীয়ে যেতিয়া সেই স্থানত উপস্থিত হয় তেতিয়া গাড়ীৰ ভিতৰত এটা বস্তা উদ্ধাৰ কৰে, যিটো লৰচৰ কৰি আছিল। বস্তাটো খুলি দিয়াৰ লগে লগে ভিতৰৰ পৰা ১০ টা সোণালী বান্দৰ ওলাই আহিল। ইয়াৰে আঠটা সোণালী বান্দৰ খৰধৰকৈ ওলাই আহি ইফালে সিফালে পলাই যোৱাৰ বিপৰীতে দুটা সোণালী বান্দৰ আঘাতপ্ৰাপ্ত অৱস্থাত উদ্ধাৰ হয়।
আৰক্ষীয়ে আহত সোণালী বান্দৰ দুটাক কাটৰাৰ পশু চিকিৎসালয়ত ভৰ্তি কৰে।
আৰক্ষীৰ তদন্তত জানিব পৰা মতে দুৰ্ঘটনাগ্ৰস্ত গাড়ীখনৰ চালক য়াছিন, আনহাতে গাড়ীখনৰ মালিক শ্বাহজাহানপুৰৰ নিবাসী বীৰেশ। আৰক্ষীয়ে এতিয়া এই সমগ্ৰ বিষয়টোৰ গভীৰ তদন্ত কৰি জানিবলৈ বিচাৰিছে সোণালী বান্দৰবোৰ ক’লৈ লৈ যোৱা হৈছিল আৰু এই চোৰাং ব্যৱসায়ৰ আঁৰৰ মানুহ কোন। বন্যপ্ৰাণী সুৰক্ষা আইনৰ অধীনত এটা গোচৰ ৰুজু কৰি অধিক ব্যৱস্থা গ্ৰহণ কৰা হৈছে।
Continue Reading
