ডিজিটেল ডেস্কঃ সমাগত এছিয়ান গেমছৰ বাবে খেলুৱৈসকলক প্ৰস্তুত কৰাৰ লক্ষ্যৰে টেগ (টাৰ্গেট এছিয়ান গেমছ)ৰ অধীনত ছিনিয়ৰ ৰাষ্ট্ৰীয় টাইকোৱানডো চেম্পিয়নশ্বিপত স্বৰ্ণ পদক বিজয়ী অসমৰ ৰ’দালি বৰুৱাই স্থান লাভ কৰিছে। টেগ হ'ল টাৰ্গেট অলিম্পিক পডিয়ামৰ অধীনৰ এক নতুন আঁচনি৷
টাৰ্গেট এছিয়ান গেমছ আঁচনিৰ বাবে নিৰ্বাচিত হোৱাত ৰ’দালি বৰুৱাক অভিনন্দন জনাইছে অসম টাইকোৱানডো সন্থাৰ সভাপতি তথা বিধায়ক বিলীন চেতিয়া আৰু সাধাৰণ সম্পাদক হিৰণ্য শইকীয়াই। ইয়াৰ জৰিয়তে অসমৰ টাইকোৱানডো খেলুৱৈয়ে ৰাষ্ট্ৰীয় মান্যতা লাভ কৰা বুলি সাধাৰণ সম্পাদক শইকীয়াই মন্তব্য কৰে। লগতে আগন্তুক এছিয়ান গেমছত শীৰ্ষ সফলতা অৰ্জন কৰিব বুলি শইকীয়াই লগতে উল্লেখ কৰে। খেলুৱৈগৰাকীয়ে মূলতঃ হেভিৱেট মহিলাৰ শাখাত (৭৩ কেজি ঊৰ্দ্ধৰ) প্ৰতিযোগিতা কৰিছে ।
অতি শেহতীয়াকৈ যোৱা বছৰ এছিয়ান চেম্পিয়নশ্বিপত ব্ৰঞ্জৰ পদক লাভ কৰি ৰ’দালিয়ে এটা দশকৰ ভিতৰত স্বীকৃতিপ্ৰাপ্ত আন্তঃৰাষ্ট্ৰীয় টাইকোৱানডো প্ৰতিযোগিতাত ভাৰতৰ হৈ প্ৰথমটো পদক অৰ্জন কৰে। এই কৃতিত্বই তেওঁক ট'প আঁচনিৰ বাবে নিৰ্বাচিত হোৱাত গুৰুত্বপূৰ্ণ ভূমিকা পালন কৰে।
উল্লেখ্য যে ২০১৬ চনত বিশাখাপট্টনমত অনুষ্ঠিত ছিনিয়ৰ নেচনেলছত প্ৰথমটো স্বৰ্ণ পদক লাভ কৰি লক্ষ্যনীয় সাফল্য লাভ কৰিছে ৰ'দালিয়ে।
Continue Reading
