অভিনেত্ৰীৰ সৈতে আইনীভাৱে দ্বিতীয় বিবাহ সম্পন্ন; স্বয়ম্ভু RSS নেতাৰ বিৰুদ্ধে এজাহাৰ দাখিল পত্নীৰ

ডিজিটেল ডেস্ক: এক চাঞ্চল্যকৰ ঘটনা পোহৰলৈ আহিছে। এজন স্বয়ম্ভু RSS নেতাৰ বিৰুদ্ধে নিজ পত্নীয়েই উত্থাপন কৰিছে ধাৰাবাহিক প্ৰতাৰণা আৰু নিৰ্যাতনৰ ভয়ংকৰ অভিযোগ। গহপুৰৰ বাসিন্দা, নিজকে RSS নেতা বুলি পৰিচয় দিয়া ৰাকেশ শৰ্মা বৰদলৈ নামৰ যুৱকজনৰ বিৰুদ্ধে দিছপুৰ আৰক্ষী থানাত এজাহাৰ দাখিল কৰিছে তেওঁৰ পত্নী শিল্পীশিখা দেৱীয়ে। ন্যায়ৰ আশাত সংবাদ মাধ্যমৰ সন্মুখত তেওঁ স্বামীৰ সকলো কু-কৰ্মৰ মুখা খুলি দিছে।

শিল্পীশিখাৰ আটাইতকৈ ডাঙৰ অভিযোগটো হৈছে যে তেওঁক আৰু তেওঁলোকৰ কন্যাক সম্পূৰ্ণ অন্ধকাৰত ৰাখি ৰাকেশে অসমীয়া ছবি জগতৰ এগৰাকী জনপ্ৰিয় অভিনেত্ৰীৰ সৈতে আইনীভাৱে দ্বিতীয় বিবাহ সম্পন্ন কৰিছে। সেই অভিনেত্ৰীগৰাকীয়ে বৰ্তমান শিল্পীশিখাক দাবী-ধমকি দিয়ে ৰাকেশক এৰি দিবলৈ।

ইয়াৰ লগতে ৰাকেশে একাধিক যুৱতীৰ সৈতে অবৈধ সম্পৰ্ক ৰখাৰ অভিযোগ তুলিছে পত্নীয়ে। বিশেষকৈ বিবাহ বিচ্ছেদ হোৱা মহিলাসকলক তেওঁ ‘টাৰ্গেট’ কৰি প্ৰতাৰণাৰ জাল মেলে বুলি পত্নীয়ে প্ৰকাশ কৰে।

স্বামীৰ এই চৰিত্ৰহীনতাৰ সন্দৰ্ভত যেতিয়াই শিল্পীশিখা দেৱীয়ে প্ৰশ্ন উত্থাপন কৰিছিল, তেতিয়াই তেওঁৰ ওপৰত চৰম শাৰীৰিক আৰু মানসিক নিৰ্যাতন চলাইছিল ৰাকেশে।

কেৱল পাৰিবাৰিক প্ৰতাৰণাই নহয়, ৰাকেশে নিজকে RSS-ৰ নেতা বুলি ভুৱা পৰিচয় দি বহু নিবনুৱাক চাকৰি দিয়াৰ নামতো বৃহৎ পৰিমাণৰ ধন সংগ্ৰহ কৰাৰ গুৰুতৰ অভিযোগ উত্থাপিত হৈছে।

উল্লেখ্য যে, ২০২১ চনত শিল্পীশিখা দেৱী বিবাহপাশত আৱদ্ধ হৈছিল ৰাকেশ শৰ্মা বৰদলৈৰ সৈতে। বিবাহৰ মাত্ৰ দুবছৰ পিছতেই, অৰ্থাৎ ২০২৩ চনৰ আশে-পাশে ৰাকেশৰ এই সকলো কু-কৰ্ম ধৰা পৰিছিল। আনকি শিল্পীশিখাৰ পূৰ্বেও আন এগৰাকী যুৱতীক বিয়া পাতিছিল ৰাকেশে আৰু এটি পুত্ৰ সন্তানো আছে, এই সকলোবোৰ বিয়াৰ দুবছৰৰ পাছতহে গম পায় শিল্পীশিখা দেৱীয়ে। কিন্তু সংসাৰখন ভাঙি যোৱাৰ ভয়ত আৰু দিনবোৰ সোনকালেই ঠিক হৈ যাব বুলি আশা বুকুত বান্ধি ইমান দিনে নীৰৱে অপেক্ষা কৰিছিল পত্নীয়ে।

কিন্তু ধৈৰ্য্যৰ সীমা অতিক্ৰম কৰাত অৱশেষত শিল্পীশিখা দেৱীয়ে আইনী পথ বাছি লয় আৰু সংবাদ মাধ্যমৰ সন্মুখলৈ আহি অভিযুক্ত স্বামী ৰাকেশ শৰ্মা বৰদলৈৰ আচল স্বৰূপ উদঙাই দিয়ে। বৰ্তমান দিছপুৰ আৰক্ষীয়ে এই ঘটনাৰ তদন্ত আৰম্ভ কৰিছে।