অসম হকী সন্থাই চূড়ান্ত কৰিলে আন্তঃজিলা প্ৰতিযোগিতাৰ বৰ্ষপঞ্জী

দেওবাৰে নগাঁৱৰ নুৰুল আমিন ষ্টেডিয়ামৰ কাষৰ ক্ৰীড়া কমপ্লেক্সত থকা অসম হকী সন্থাৰ কাৰ্যালয়ত সন্থাৰ বাৰ্ষিক সাধাৰণ সভা অনুষ্ঠিত হয়। সন্থাৰ সভাপতি তপন কুমাৰ দাসৰ সভাপতিত্বত অনুষ্ঠিত এই সভাত ৰাজ্যজুৰি আগন্তুক হকী ছিজনত অনুষ্ঠিত হ'বলগীয়া বিভিন্ন প্ৰতিযোগিতাৰ সময়সূচী আৰু ব্যৱস্থাৱলীৰ বিষয়ে বিতংভাৱে আলোচনা কৰা হয়।

সভাত লোৱা কেইবাটাও গুৰুত্বপূৰ্ণ সিদ্ধান্তৰ ভিতৰত অন্যতম আছিল হাইলাকান্দিক জ্যেষ্ঠ মহিলাৰ আন্তঃজিলা চেম্পিয়নশ্বিপ আয়োজনৰ দায়িত্ব প্ৰদান কৰা। এই প্ৰতিযোগিতা অক্টোবৰ মাহৰ দ্বিতীয় সপ্তাহত অনুষ্ঠিত হোৱাৰ কথা আছে। আনহাতে, ১৪ বছৰ অনুৰ্ধ ল'ৰাৰ আন্তঃজিলা চেম্পিয়নশ্বিপ আয়োজনৰ বাবে কৰিমগঞ্জ হকী সংস্থাক দায়িত্ব অৰ্পণ কৰা হৈছে, যাৰ সঠিক তাৰিখ পিছত নিৰ্ধাৰণ কৰা হ'ব।

সন্থাই আন কেইবাটাও গুৰুত্বপূৰ্ণ প্ৰতিযোগিতাৰ বৰ্ষপঞ্জীও চূড়ান্ত কৰিছে। জুলাই মাহৰ প্ৰথম সপ্তাহত নগাঁৱত উপ-জুনিয়ৰ মহিলাৰ আন্তঃজিলা চেম্পিয়নশ্বিপ অনুষ্ঠিত হ'ব। ইয়াৰ পাছতে জুলাই মাহৰ দ্বিতীয় সপ্তাহত কলিয়াবৰে জুনিয়ৰ পুৰুষৰ আন্তঃজিলা চেম্পিয়নশ্বিপ আয়োজন কৰিব।

বৰ্ষটোৰ শেষৰ ফালে নাহৰকটীয়াই জুনিয়ৰ মহিলাৰ প্ৰতিযোগিতাৰ আয়োজন কৰিব বুলিও সভাত সিদ্ধান্ত লোৱা হয়। অক্টোবৰ মাহত তিনিচুকীয়াত উপ-জুনিয়ৰ ল'ৰাৰ আন্তঃজিলা চেম্পিয়নশ্বিপ অনুষ্ঠিত হ'ব, যিটোৱে ৰাজ্যৰ হকী ক্ৰীড়াৰ বাবে এক ব্যস্ত আৰু উত্তেজনাপূৰ্ণ ছিজনৰ ইংগিত বহন কৰিছে।