ডিজিটেল ডেস্কঃ পত্নীয়ে পতিৰ ওপৰত কৰা ভয়ংকৰ নৃশংস অত্যাচাৰৰ কাহিনী পোহৰলৈ আহিছে। মাজ নিশা গভীৰ টোপনিত থকা অৱস্থাত এজন লোকক পত্নীয়ে গৰম উতলা তেল দেহৰ ওপৰত ঢালি দিয়ে। লোকজনে যন্ত্ৰণাত ছটফটাই থকাৰ সময়তে পত্নীয়ে জলকীয়া গুড়ি ঢালি দিয়ে। এই ঘটনা দিল্লীত সংঘটিত হৈছে।
লোকজনৰ মৰণ কাতৰ চিঞৰ শুনি ঘৰৰ মালিকে ততাতৈয়াকৈ তেওঁক চিকিৎসালয়লৈ লৈ যায়। তেওঁৰ অৱস্থা অধিক বেয়া হোৱা দেখি চিকিৎসকে তেওঁক ছফদাৰজং হাস্পতাললৈ প্ৰেৰণ কৰে, য’ত তেওঁক আই চি ইউত ভৰ্তি কৰা হয়। লোকজনৰ অৱস্থা সংকটজনক হৈয়ে আছে।
ভুক্তভোগীৰ বক্তব্যৰ ভিত্তিত গোচৰ ৰুজু কৰি তদন্ত আৰম্ভ কৰিছ আৰক্ষীয়ে। পত্নী আৰু এগৰাকী কণমানি কন্যাৰে তেওঁ ভাড়াঘৰত বাস কৰে। ব্যক্তিগত ফাৰ্মাচিউটিকেল কোম্পানীত কৰ্মৰত লোকজনে ৮ বছৰ পূৰ্বে বিবাহপাশত আবদ্ধ হয়। দুবছৰ পূৰ্বে পত্নীয়ে ভুক্তভোগীৰ বিৰুদ্ধে আৰক্ষীক এজাহাৰ দাখিল কৰিছিল যদিও দুয়োৰে মাজত এক নিষ্পত্তি হয়। তেওঁৰ পত্নীৰ বিৰুদ্ধে এতিয়াও CAW কোষত এজাহাৰ দাখিল কৰা হৈছে।
আৰক্ষীক দিয়া বক্তব্যত ভুক্তভোগীয়ে উল্লেখ কৰিছে যে তেওঁ কৰ্মস্থলীৰ পৰা উভতি আহি ৰাতিৰ আহাৰ গ্ৰহণ কৰি শুইছিল। ওচৰতে শুই আছিল তেওঁৰ ছোৱালী আৰু পত্নী। হঠাতে ৩:১৫ বজাত শৰীৰত জ্বলা-পোৰা অনুভৱ কৰি তেওঁ সাৰ পালে। তেওঁ দেখিলে যে পত্নীয়ে তেওঁৰ ওপৰত উতলি থকা গৰম তেল ঢালি হাতত ৰঙা জলকীয়াৰ গুড়ি লৈ থিয় হৈ আছে। এই কথাত স্তম্ভিত হৈ পৰে ভুক্তভোগী লোকজন। নিজকে ৰক্ষা কৰাৰ আগতেই তেওঁৰ পত্নীয়ে গৰম তেলৰ ফলত হোৱা ঘাঁত ৰঙা জলকীয়াৰ গুড়ি ছটিয়াবলৈ ধৰিলে।
ভুক্তভোগীৰ বক্তব্যৰ ভিত্তিত আৰক্ষীয়ে সংশ্লিষ্ট ধাৰাত পত্নীৰ বিৰুদ্ধে গোচৰ ৰুজু কৰি তদন্ত অব্যাহত ৰাখিছে।
Continue Reading
