ডিজিটেল ডেস্ক: ইণ্ডিয়া মৰ্চাৰ ২৫টা বিৰোধী দলে সোমবাৰে এক পাঁচদফীয়া কর্মসূচী গ্ৰহণ কৰে। এই কৰ্মসূচীৰ ভিতৰত আছে নির্বাচনী অনিয়মৰ বিষয়ত ভাৰতৰ মুখ্য ন্যায়াধীশলৈ পত্ৰ প্ৰেৰণ, কেন্দ্ৰীয় শিক্ষা মন্ত্ৰীৰ পদত্যাগ দাবী আৰু দেশে মুখামুখি হোৱা অর্থনৈতিক প্রত্যাহ্বানৰ বিষয়ত সংসদৰ বর্ষাকালীন অধিৱেশনৰ আগত সর্বদলীয় বৈঠক অনুষ্ঠিত কৰিবলৈ কেন্দ্ৰীয় চৰকাৰক হেঁচা দিয়া।
ইণ্ডিয়া মৰ্চাৰ মিত্ৰ দলবোৰৰ নেতাসকলৰ নতুন দিল্লীৰ কনষ্টিটিউশ্যন ক্লাবত অনুষ্ঠিত এখন বৈঠকৰ পাছত সংবাদমেলত কংগ্ৰেছৰ সভাপতি মল্লিকার্জুন খর্গেয়ে কয় যে আগন্তুক সময়ত তেওঁলোকৰ সমন্বিত ৰাজনৈতিক আৰু সংসদীয় কৌশল গঢ়াৰ পাঁচটা মূল বিষয়ত বিৰোধী দলবোৰ ঐকমত্যত উপনীত হয়। তেওঁ কয়, 'আজি আমি পাঁচটা বিষয়ত সহমত প্রকাশ কৰোঁ আৰু আমি এই পাঁচদফীয়া কৰ্মসূচীৰ মতে কাম কৰিম। প্রথম দফা হৈছে, এফ আই আৰ, ভোট চুৰি আৰু নিৰ্বাচন চুৰিৰ ক্ষেত্ৰত ভাৰতৰ মুখ্য ন্যায়াধীশলৈ (চি জে আই) এখন পত্র প্ৰেৰণ। সোনকালেই চি জে আইলৈ উক্ত পত্ৰ প্ৰেৰণ কৰা হ'ব।' নীট আৰু চি বি এছ ই-ৰ পৰীক্ষাত অৱতীৰ্ণ লাখ লাখ শিক্ষার্থীৰ আশা ভংগ কৰাৰ অভিযোগ কৰি তেওঁ কয় যে দ্বিতীয় দফা হৈছে কেন্দ্রীয় শিক্ষা মন্ত্ৰীৰ তৎকালীন পদত্যাগৰ দাবী। তৃতীয় দফাৰ মতে, ভাৰতৰ শোচনীয় অর্থনৈতিক পৰিস্থিতিৰ সন্দৰ্ভত এক সৰ্বদলীয় বৈঠকৰ বাবে দাবী জনোৱা হ'ব। খৰ্গেৰ মতে, প্ৰস্তাৱিত বৈঠকত নিবনুৱা, মূল্য বৃদ্ধি, কৃষকৰ উদ্বেগ আৰু সাধাৰণ নাগৰিকৰ ওপৰত প্ৰভাৱ পেলোৱা আন সমস্যাবোৰৰ আলোচনা হোৱা উচিত।
চতুর্থ দফা মতে, ইণ্ডিয়া মৰ্চাৰ মিত্ৰ দলবোৰ প্ৰতি দুমাহৰ মূৰত বৈঠকত মিলিত হ'ব। ইণ্ডিয়া মৰ্চাৰ কৰ্মসূচীৰ পঞ্চম দফা মতে, সংসদীয় সমন্বয় অব্যাহত ৰাখি সংসদৰ বৰ্ষাকালীন অধিৱেশনৰ সময়ত প্রতিদিনা পুৱা ইণ্ডিয়া মৰ্চাৰ বৈঠক অনুষ্ঠিত হ'ব। বৈঠকত খৰ্গেৰ উপৰি উপস্থিত থকাসকলৰ ভিতৰত আছিল কংগ্ৰেছৰ ছোনিয়া গান্ধী আৰু ৰাহুল গান্ধী, সমাজবাদী পাৰ্টিৰ মুৰব্বী অখিলেশ যাদৱ, আৰ জে ডিৰ নেতা তেজস্বী যাদৱ, তৃণমূল কংগ্ৰেছৰ অধ্যক্ষা মমতা বেনার্জী, চি পি আই (এম এল)-ৰ সাধাৰণ সম্পাদক দীপাংকৰ ভট্টাচাৰ্য, পি ডি পিৰ সভানেত্রী মেহবুবা মুফটি, এন চি পি (শাৰদ পাৱাৰ) নেত্রী সুপ্রিয়া সুলে, ভি চি কেৰ মুৰব্বী থয় তিৰুমাৱালাৱন আৰু চি পি আই (এম)ৰ সাংসদ জন ব্রিটাছ। আনসকলৰ ভিতৰত উদ্ধৱ থাকৰে আৰু হেমন্ত ছোৰেন আদিয়ে ভার্চুৱেলী বৈঠকত অংশ গ্রহণ কৰে।
উৎস: দৈনিক জনমভূমি
Continue Reading
