ডিজিটেল ডেস্ক: কেৰালাত দেওবাৰে সংঘটিত ধাৰাবাহিক বিস্ফোৰণ সন্দৰ্ভত বিতৰ্কিত মন্তব্য কৰি সংকটত কেন্দ্ৰীয় মন্ত্ৰী ৰাজীৱ চন্দ্ৰশেখৰ৷ শেহতীয়াকৈ কেন্দ্ৰীয় মন্ত্ৰীগৰাকীৰ বিৰুদ্ধে ৰুজু হৈছে গোচৰ৷ সামাজিক বিদ্বেষ বিয়পোৱাৰ অভিযোগত মন্ত্ৰীজনৰ বিৰুদ্ধে গোচৰটো পঞ্জীয়ন কৰা হৈছে। সংবাদ সংস্থা ‘পিটিআই’-এ এজন জ্যেষ্ঠ আৰক্ষী বিষয়াৰ উদ্ধৃতি দি কয়, বিভিন্ন গোটৰ মাজত শত্ৰুতা বৃদ্ধি কৰিব পৰা মন্তব্য দিয়াৰ বাবে তেওঁক অভিযুক্ত কৰা হৈছে।
দেওবাৰে কেৰালাত এখন প্ৰাৰ্থনা সভাত ধাৰাবাহিক বিস্ফোৰণৰ কেইঘণ্টামান পাছতে চন্দ্ৰশেখৰে মুখ্যমন্ত্ৰী পিনাৰাই বিজয়নক তুষ্টিকৰণৰ ৰাজনীতিৰ অভিযোগ তুলি তীব্ৰ সমালোচনা কৰিছিল৷
কেন্দ্ৰীয় মন্ত্ৰীগৰাকীয়ে ছ’চিয়েল মিডিয়া প্লেটফ’ৰ্ম ‘এক্স’ত লিখিছিল, দুৰ্নীতিৰ অভিযোগত আৱদ্ধ হৈ থকা এজন অখ্যাত মুখ্যমন্ত্ৰীৰ দ্বাৰা এয়া লেতেৰা নিৰ্লজ্জ তোষণৰ ৰাজনীতি। দিল্লীত বহি ইজৰাইলৰ বিৰুদ্ধে প্ৰতিবাদ কৰি, যেতিয়া কেৰালাত সন্ত্ৰাসবাদী হামাছে জেহাদৰ বাবে মুকলি আহ্বান জনাইছে, তেতিয়া নিৰীহ খ্ৰীষ্টানসকলৰ ওপৰত আক্ৰমণ আৰু বোমা বিস্ফোৰণ ঘটিছে৷
তেওঁ মালাপ্পুৰমৰ এটা ধৰ্মীয় গোটৰ দ্বাৰা আয়োজিত এক অনুষ্ঠানত হামাছ অপাৰেটিভৰ ভাৰ্চুৱেল ঠিকনাক লৈ বিজয়নক সমালোচনা কৰিছিল।
চন্দ্ৰশেখৰৰ প্ৰতি সঁহাৰি জনাই মুখ্যমন্ত্ৰী বিজয়নে কয় যে যিসকল বিষাক্ত তেওঁলোকে তেওঁলোকৰ বিহ উলিয়াই থাকিব। এজন দায়িত্বশীল মন্ত্ৰী হিচাপে তেওঁ ঘটনাটো চোৱা-চিতা কৰা তদন্তকাৰী সংস্থাবোৰৰ প্ৰতি ন্যূনতম সন্মান প্ৰদৰ্শন কৰিব লাগিছিল।
চন্দ্ৰশেখৰে আৰু অভিযোগ কৰে যে মুখ্যমন্ত্ৰীৰ শাসনৰ অধীনত কেৰালাই মৌলবাদী উপাদানৰ প্ৰতি সহনশীলতা বৃদ্ধি দেখুৱাইছে।
তেওঁ কয়, মুখ্যমন্ত্ৰী পিনাৰাই বিজয়নৰ অধীনত কেৰালাত মৌলবাদী উপাদান আৰু মৌলবাদৰ প্ৰতি সহনশীলতা বৃদ্ধি পাইছে। কেৰালাত কংগ্ৰেছ আৰু বাঁওপন্থী উভয়ৰ দ্বাৰা মৌলবাদী উপাদানৰ তোষণৰ ইতিহাস আছে৷
দেওবাৰে কেৰালাৰ এখন সন্মিলন কেন্দ্ৰত সংঘটিত ধাৰাবাহিক বিস্ফোৰণত দুজন মহিলা আৰু এগৰাকী ১২বছৰীয়া কিশোৰী নিহত হয় আৰু ৫০জন লোক আহত হয়। প্ৰাৰ্থনা সভা আৰম্ভ হোৱাৰ কেইমিনিটমানৰ ভিতৰতে কমেও তিনিটা বিস্ফোৰণৰ খবৰ পোৱা গৈছিল।
কেইঘণ্টামানৰ পাছত প্ৰাৰ্থনা সভাৰ আয়োজন কৰা যিহোৱাৰ সাক্ষীসকলৰ এজন ৪৮ বছৰীয়া ব্যক্তিয়ে এই বিস্ফোৰণৰ দায়িত্ব স্বীকাৰ কৰে আৰু আত্মসমৰ্পণ কৰে।
Continue Reading
