অসমত ১৫ বছৰৰ ঊৰ্ধ্বৰ ৭ শতাংশ মহিলাই সুৰা পান কৰে

ডিজিটেল ডেস্কঃ অসমত গড়ে প্ৰায় ২৫ শতাংশ পুৰুষ আৰু ১৫ বছৰৰ অধিক বয়সৰ ৭ শতাংশ মহিলাই সুৰা পান কৰা বুলি শেহতীয়া ৰাষ্ট্ৰীয় পৰিয়াল স্বাস্থ্য জৰীপ (এন.এফ.এইচ.এছ.) প্ৰতিবেদনত প্ৰকাশ পাইছে। ৰাষ্ট্ৰীয় পাৰিবাৰিক স্বাস্থ্য জৰীপ (এন.এফ.এইচ.এছ.) হৈছে সমগ্ৰ ভাৰতত পৰিয়ালবোৰৰ এক প্ৰতিনিধিত্বমূলক নমুনাত কৰা এক বহুমুখী জৰীপ। শেহতীয়া এন.এফ.এইচ.এছ.-৫ জৰীপটো ২৮ খন ৰাজ্য আৰু ৮খন কেন্দ্ৰীয় শাসিত অঞ্চলৰ ৭০৭ খন জিলাৰ প্ৰায় ৬.৩৭ লাখ নমুনা পৰিয়ালত কৰা হৈছিল। য'ত জিলা পৰ্যায়লৈকে পৃথক আকলন প্ৰদান কৰাৰ বাবে ৭,২৪,১১৫ গৰাকী মহিলা আৰু ১,০১,৮৩৯জন পুৰুষক সামৰি লোৱা হৈছিল। এনএফএইচএছ-৫ প্ৰতিবেদনখন শেহতীয়াকৈ গুজৰাটৰ বদোদৰাত কেন্দ্ৰীয় স্বাস্থ্যমন্ত্ৰী মনসুখ মাণ্ডৱিয়াই প্ৰকাশ কৰিছে।

প্ৰতিবেদন অনুসৰি, ২২ শতাংশ পুৰুষৰ তুলনাত ভাৰতত মাত্ৰ ১শতাংশ মহিলাই সুৰা পান কৰে। অসমত চহৰাঞ্চলত ২.৫ শতাংশ মহিলা আৰু গ্ৰাম্য অঞ্চলৰ ৮.২ শতাংশ মহিলাই (১৫ বছৰৰ ঊৰ্ধ্বৰ) সুৰাপান কৰা বুলি প্ৰকাশ পাইছে। আনহাতে, গ্ৰামাঞ্চলত ২১.২ শতাংশ আৰু চহৰাঞ্চলত ২৬ শতাংশ পুৰুষে অসমত সুৰাপান কৰে। সমগ্ৰ দেশৰ ভিতৰতে অৰুণাচল প্ৰদেশত  সুৰাপানকাৰীৰ হাৰ সৰ্বাধিক। প্ৰতিবেদন অনুসৰি, অৰুণাচল প্ৰদেশ (২৪ শতাংশ) আৰু ছিকিমত (১৬ শতাংশ) ১৫ বছৰ বা তাতকৈ অধিক বয়সৰ মহিলাৰ মাজত সুৰাৰ প্ৰচলন সৰ্বাধিক হিচাপে বিবেচিত হৈছে। অৰুণাচল প্ৰদেশতো পুৰুষৰ মাজত সুৰাৰ ব্যৱহাৰ সৰ্বাধিক ৫৩ শতাংশ, ছিকিমত ৪০ শতাংশ। উত্তৰ-পূবৰ ৰাজ্যসমূহৰ ভিতৰত, মণিপুৰ, মিজোৰাম আৰু নাগালেণ্ডত সুৰা পান কৰা মহিলাৰ সৰ্বনিম্ন শতাংশ (০.৯ শতাংশ) নথিভুক্ত কৰা হৈছে। পুৰুষৰ ক্ষেত্ৰত, মিজোৰাম (২৩.৭ শতাংশ) আৰু নাগালেণ্ডত (২৩.৯ শতাংশ) সুৰাপানকাৰীৰ সৰ্বনিম্ন হাৰ নথিভুক্ত কৰা হৈছিল। মেঘালয়ত মাত্ৰ ১.৫ শতাংশ মহিলা আৰু ৩২.৪ শতাংশ পুৰুষে সুৰা পান কৰা বুলি( প্ৰকাশ পাইছে। আনহাতে, ত্ৰিপুৰাত ৬.৩ শতাংশ মহিলা আৰু ৩৩ শতাংশ পুৰুষে সুৰাপান কৰে।