অসমত ২ লাখ কোটি টকাৰ বিনিয়োগ কাৰ্যকৰী হোৱাৰ পথত: মন্ত্ৰী বিমল বৰা

গুৱাহাটী: অসমত বৰ্তমান ২ লাখ কোটি টকাৰ বিনিয়োগ বিভিন্ন পৰ্যায়ত কাৰ্যকৰী হৈ আছে বুলি উদ্যোগ আৰু বাণিজ্য মন্ত্ৰী বিমল বৰাই সদৰি কৰিছে। যোৱা বৰ্ষৰ ফেব্ৰুৱাৰী মাহত অনুষ্ঠিত হোৱা 'ইনভেষ্টমেণ্ট আছাম ছামিট ২'ত ৰাজ্যখনত মুঠ ৫ লাখ কোটি টকাৰ বিনিয়োগৰ বাবে বুজাবুজি চুক্তি স্বাক্ষৰিত হৈছিল। ইয়াৰে এক বৃহৎ অংশই এতিয়া বাস্তৱ ৰূপ লোৱাৰ পথত বুলি মন্ত্ৰীগৰাকীয়ে উল্লেখ কৰে।

মন্ত্ৰী বৰাই জনোৱা অনুসৰি, এই ২ লাখ কোটি টকাৰ বিনিয়োগৰ সৈতে জড়িত উদ্যোগসমূহ বিভিন্ন পৰ্যায়ত আছে। কিছুমান উদ্যোগৰ উৎপাদন ইতিমধ্যে আৰম্ভ হৈছে, কিছুমান নিৰ্মাণাধীন অৱস্থাত আছে, আৰু আন কিছুমান কাৰ্যকৰী হোৱাৰ বাবে প্ৰস্তুতি চলাই আছে। এই প্ৰকল্পসমূহ সম্পূৰ্ণ হ'লে ৰাজ্যৰ অৰ্থনীতিত এক বৃহৎ গতি আহিব আৰু যথেষ্ট সংখ্যক যুৱক-যুৱতীৰ বাবে কৰ্মসংস্থাপনৰ সৃষ্টি হ'ব বুলি আশা কৰা হৈছে।

মন্ত্ৰীগৰাকীয়ে লগতে কয় যে এই বুজাবুজি চুক্তিসমূহৰ অগ্ৰগতি সৰ্বোচ্চ পৰ্যায়ত নিয়মীয়াকৈ নিৰীক্ষণ কৰা হৈছে। বিনিয়োগকাৰীসকলে ৰাজ্য চৰকাৰৰ নতুন 'কাষ্টমাইজড পলিচি' অতি আকৰ্ষণীয় বুলি অভিহিত কৰিছে। এই নীতি অনুসৰি, যদি কোনো বিনিয়োগ ১০০ কোটি টকাতকৈ অধিক হয় আৰু ই ২০০ৰো অধিক স্থানীয় যুৱক-যুৱতীক নিয়োগ প্ৰদান কৰে, তেন্তে চৰকাৰে সেই উদ্যোগসমূহলৈ সংযোগ পথ, বিদ্যুৎ যোগান আৰু পানী যোগানৰ ব্যৱস্থা কৰিব।

এই সুবিধাৱলীয়ে কেৱল উদ্যোগসমূহকেই নহয়, উদ্যোগসমূহৰ ওচৰত বাস কৰা সাধাৰণ জনসাধাৰণকো উপকৃত কৰিব, কিয়নো তেওঁলোকেও এই আন্তঃগাঁথনিমূলক সুবিধাৰ লাভ উঠাব পাৰিব।