ডিজিটেল ডেস্ক: সংকটগ্ৰস্ত শ্ৰীলংকাত পুনৰ বাঢ়িল পেট্ৰ’ল আৰু ডিজেলৰ দাম৷ শ্ৰীলংকাত প্ৰতি লিটাৰ পেট্ৰ’লৰ দাম বৃদ্ধি পালে ৪২০ টকালৈ আৰু প্ৰতি লিটাৰ ডিজেলৰ দাম বৃদ্ধি পালে ৪০০ টকালৈ৷ অৰ্থনৈতিকভাৱে বিধ্বস্ত হৈ পৰা শ্ৰীলংকাই ইন্ধন পাম্পবোৰ শুকান হোৱাক প্ৰতিহত কৰিবলৈ বিভিন্ন বিকল্প পন্থা অৱলম্বন কৰি আহিছে৷ কিয়নো, দেশখনে ইন্ধনৰ আমদানিৰ বাবে পৰিশোধ কৰিবলৈ তীব্ৰ বৈদেশিক মুদ্ৰা সংকটৰ সন্মুখীন হৈছে।
সংকটগ্ৰস্ত শ্ৰীলংকাই আজি পেট্ৰ’লৰ দাম ২৪.৩ শতাংশ আৰু ডিজেলৰ দাম ৩৮.৪ শতাংশ বৃদ্ধি কৰিছে, যি হৈছে বৈদেশিক মুদ্ৰাৰ ভাণ্ডাৰৰ অভাৱৰ বাবে দেশখনৰ আটাইতকৈ বিপৰ্যস্ত অৰ্থনৈতিক সংকটৰ মাজত ইন্ধনৰ দামৰ অভিলেখ বৃদ্ধি। ১৯ এপ্ৰিলৰ পৰা দ্বিতীয়বাৰ ইন্ধনৰ দাম বৃদ্ধিৰ সৈতে, এতিয়া সৰ্বাধিক ব্যৱহৃত অকটেন ৯২ পেট্ৰ’লৰ দাম প্ৰতিলিটাৰত ৪২০ টকা আৰু ডিজেলৰ দাম প্ৰতিলিটাৰত ৪০০ টকা হ’লগৈ, যি দেশখনত সৰ্বকালৰ সৰ্বাধিক।
অকটেন ৯২ পেট্ৰ’লৰ দাম ২৪.৩ শতাংশ বা ৮২ টকা আৰু ডিজেল প্ৰতি লিটাৰত ৩৮.৪ শতাংশ বা ১১১ টকা বৃদ্ধি কৰাৰ সিদ্ধান্ত ৰাজ্যিক ইন্ধন সংস্থা চিলন পেট্ৰ’লিয়াম কৰ্পোৰেচন (চিপিচি)য়ে গ্ৰহণ কৰে।
শক্তি মন্ত্ৰী কাঞ্চনা উইজেচেকাৰাই টুইটাৰত কয়, ইন্ধনৰ দাম আজি পুৱা ৩ বজাৰ পৰা সংশোধন কৰা হ’ব। কেবিনেটৰ দ্বাৰা অনুমোদিত ইন্ধন দাম নিৰ্ধাৰণৰ সূত্ৰ দাম সংশোধনৰ বাবে প্ৰয়োগ কৰা হৈছিল৷ তেওঁ লগতে লিখিছে, ষ্টেচনবোৰত আমদানি, আনলোডিং, বিতৰণ আৰু কৰত হোৱা সকলো ব্যয় দাম সংশোধনত অন্তৰ্ভুক্ত থাকে৷ কেবিনেটে সেই অনুসৰি পৰিবহণ আৰু অন্যান্য সেৱা মাচুল সংশোধনৰ বাবেও অনুমোদন জনাইছে। সূত্ৰটো প্ৰতি পষেক বা মাহত প্ৰয়োগ কৰা হ’ব৷
ভাৰতৰ ইণ্ডিয়ান অইল কৰ্পোৰেচনৰ শ্ৰীলংকাৰ সহায়ক সংস্থা লংকা আইঅ’চিয়েও ইন্ধনৰ খুচুৰা দাম বৃদ্ধি কৰিছে। এলআইঅ’চিৰ মুখ্য কাৰ্যবাহী বিষয়া মনোজ গুপ্তাই প্ৰেছ ট্ৰাষ্ট অব্ ইণ্ডিয়াক কয়, আমি চিপিচিৰ সৈতে মিলাবলৈ আমাৰ দাম বৃদ্ধি কৰিছোঁ৷ ইফালে, অটো-ৰিক্সা অপাৰেটৰসকলে কয় যে তেওঁলোকে শুল্ক প্ৰতি প্ৰথম কিলোমিটাৰত ৯০ টকা আৰু দ্বিতীয় কিলোমিটাৰত ৮০ টকালৈ বৃদ্ধি কৰিব৷
লংকা আইঅচি ২০০২ চনৰ পৰা শ্ৰীলংকাত কাৰ্যকৰী হৈ আছে। দ্বীপৰাষ্ট্ৰখনে অভূতপূৰ্ব অৰ্থনৈতিক অস্থিৰতাৰ সৈতে যুঁজি আছে, যিটো ১৯৪৮ চনত ব্ৰিটেইনৰ পৰা স্বাধীনতা পোৱাৰ পাছত আটাইতকৈ ভয়াবহৰূপে বিবেচিত হৈছে৷ দেশখনে প্ৰায় সকলো প্ৰয়োজনীয় সামগ্ৰীৰ অভাৱৰ সৈতে যুঁজি আছে, আমদানিৰ বাবে পৰিশোধ কৰিবলৈ ডলাৰৰ অভাৱৰ বাবে।
বিদেশী ভাণ্ডাৰৰ অভাৱৰ ফলত ইন্ধন, ৰন্ধন গেছ আৰু অন্যান্য অত্যাৱশ্যকীয় সামগ্ৰীৰ বাবে দীঘলীয়া শাৰী সৃষ্টি হৈছে৷ আনহাতে বিদ্যুৎ কৰ্তন আৰু খাদ্যৰ বৰ্ধিত দামে দেশখনৰ নাগৰিকলৈ নমাই আনিছে নিত্যনতুন সংকট৷ অৰ্থনৈতিক সংকটে শ্ৰীলংকাত এক ৰাজনৈতিক সংকট আৰু ৰাষ্ট্ৰপতি গোটাবায়া ৰাজপাক্ষেৰ পদত্যাগৰ দাবীও সৃষ্টি কৰিছে। এই সংকটে ইতিমধ্যে ৰাষ্ট্ৰপতিৰ জ্যেষ্ঠ ভাতৃ প্ৰধানমন্ত্ৰী মহিন্দা ৰাজপাক্ষেক ৯ মে’ত পদত্যাগ কৰিবলৈ বাধ্য কৰাইছে৷
দেশখনত মুদ্ৰাস্ফীতিৰ হাৰ বৃদ্ধি পাইছে ৪০ শতাংশলৈ৷ খাদ্য, ইন্ধন আৰু ঔষধৰ অভাৱ আৰু ৰোলিং পাৱাৰ ব্লেকআউটৰ ফলত দেশজুৰি প্ৰতিবাদ আৰু মুদ্ৰা হ্ৰাস পাইছে, যাৰ ফলত চৰকাৰে আমদানিৰ বাবে পৰিশোধ কৰিবলগীয়া বৈদেশিক মুদ্ৰাৰ ভাণ্ডাৰৰ অভাৱ হৈছে।
Continue Reading
