তামুলপুৰ জিলাত সংঘটিত এক ভয়ংকৰ পথ দুৰ্ঘটনাত একেটা পৰিয়ালৰ তিনিজন যুৱকৰ কৰুণ মৃত্যু হোৱাত অঞ্চলটোত গভীৰ শোকৰ ছাঁ পৰিছে। বৃহস্পতিবাৰে নিশা খণ্ডিকাৰৰ সমীপত ৰঙিয়া–নাগ্ৰীজুলি পথত এই হৃদয়বিদাৰক ঘটনা সংঘটিত হয়।
নিহত যুৱককেইজনক চিৰাখুন্দি গাঁৱৰ জুবেৰ হুছেইন (১৪), মাজৰুল চুলতান (১৮) আৰু চুলতান আলী (২১) বুলি চিনাক্ত কৰা হৈছে। ইয়াৰে জুবেৰ আৰু মাজৰুল ক্ৰমে ভাতৃ আছিল, আনহাতে চুলতান আলী আছিল তেওঁলোকৰ পেহীয়েকৰ পুতেক অৰ্থাৎ সম্বন্ধীয় ভায়েক। এই ঘটনাই পৰিয়ালটোত গভীৰ শোকৰ সৃষ্টি কৰিছে।
আৰক্ষীয়ে জনোৱা মতে, এই দুৰ্ঘটনা বৃহস্পতিবাৰে নিশা প্ৰায় ১০ বজাত কাওৰবাহা আৰক্ষী টহলদাৰী চকীৰ অন্তৰ্গত খণ্ডিকাৰ ৰেলপথৰ ওচৰত সংঘটিত হৈছিল। ৰঙিয়া অভিমুখে গৈ থকা AS01GU3702 নম্বৰৰ এখন মটৰচাইকেলৰ বিপৰীত দিশৰ পৰা নাগ্ৰীজুলি অভিমুখে আহি থকা AS01RC1884 নম্বৰৰ এখন বলেৰো পিকআপ ভেনৰ সৈতে মুখামুখি সংঘৰ্ষ হয়।
সংঘৰ্ষৰ ফলত মটৰচাইকেলখনৰ চালক আৰু দুজন আৰোহী পথৰ ওপৰত পৰি গুৰুতৰভাৱে আহত হয়। স্থানীয় লোক আৰু আৰক্ষীয়ে ততাতৈয়াকৈ তিনিওজনক কাওৰবাহা বিপিচিএইচ আৰু স্বস্তি চিকিৎসালয়লৈ লৈ যায়। কিন্তু চিকিৎসকে তেওঁলোকক চিকিৎসালয়লৈ অনাৰ পূৰ্বেই মৃত্যু হোৱা বুলি ঘোষণা কৰে। এই দুৰ্ঘটনা সন্দৰ্ভত আৰক্ষীয়ে তদন্ত অব্যাহত ৰাখিছে।
Continue Reading
