ডিজিটেল ডেস্কঃ দৌৰ প্ৰতিযোগিতাত ঘোঁৰাক পৰাস্ত কৰাটো মুখৰ কথা নহয়। ঘোঁৰা মানেই যেন দৌৰ! সেই ঘোঁৰাক দৌৰি পৰাস্ত কৰাতো, তাকো প্ৰতিযোগিতাত! মানুহৰ পক্ষে কিমান সহজসাধ্য? কিন্তু এই অসাধ্য সাধন কৰিবলৈ সক্ষম হৈছে এগৰাকী যুৱকে। হয়, ৩৬ কিলোমিটাৰ দৌৰত প্ৰথম স্থান লাভ কৰিছে ৰিকি লাইটফুটে। যুক্তৰাজ্যৰ ৱেলছত অনুষ্ঠিত হৈছিল এই প্ৰতিযোগিতা। ৰিকিয়ে এই দৌৰ প্ৰতিযোগিতাত প্ৰায় ৫০টা ঘোঁৰাক অতিক্ৰমী বিজয়ী হৈছে! ১৯৮০ চনত ৱেলছত আৰম্ভ হৈছিল এই ব্যতিক্ৰমী প্ৰতিযোগিতা। এতিয়ালৈকে ৰিকিৰ সৈতে এই প্ৰতিযোগিতাত মাত্ৰ তিনিজন লোকেহে প্ৰথম স্থান লাভ কৰিছে। বাকী প্ৰতিযোগিতাবোৰত এই কীৰ্তি আছে ঘোঁৰাৰ দখলত।
খবৰ অনুসৰি, ৰিকি কেনেৰী দ্বীপপুঞ্জৰ টেনেৰিফৰ বাসিন্দা। ৱেলছলৈ আহিবলগীয়া হোৱা সময়ত বহু দূৰ বাট অতিক্ৰম কৰিবলগীয়া হৈছে তেওঁ। একেৰাহে ২৯ ঘণ্টা সাৰ পাই থাকিব লগা হৈছিল ৰিকিয়ে৷ এই সকলোবোৰৰ লগে লগে প্ৰতিযোগিতাতো অংশগ্ৰহণ কৰিবলগীয়া হৈছিল ৰিকিয়ে।
ইফালে, ৰিকিৰ ইতিমধ্যে দৌৰাৰ অভিজ্ঞতা পূৰ্বৰ পৰাই আছে। কিন্তু ৱেলছৰ প্ৰতিযোগিতাত যে তেওঁ প্ৰথম হৈছে সেই কথা তেওঁ উপলব্ধি কৰা নাছিল। কাৰণ, মানুহ আৰু ঘোঁৰাৰ দৌৰাৰ পথ আছিল বেলেগ। পৰৱৰ্তী সময়ত চৌপাশৰ মানুহক সোধ পোছ কৰোতেহে জানিবলৈ পোৱা গ’ল যে, প্ৰতিযোগিতাত ১০০০ মানুহ আৰু ৫০ টা ঘোঁৰাক চেৰ পেলাই বিজয়ী হৈছে ৰিকি। গোটেই বাট দৌৰিবলৈ ৰিকিক ২ ঘণ্টা ২২ মিনিট ২৩ ছেকেণ্ড সময় লাগিছিল। পুৰস্কাৰ হিচাপে ৰিকিয়ে লাভ কৰিছে ৪ লাখ টকা।
Continue Reading
