১৩০ বছৰীয়া ইতিহাসত আইঅ’চিৰ প্ৰথমগৰাকী মহিলা সভানেত্ৰী হিচাপে পৰিগণিত হ’ল কিৰ্ষ্টি কভেণ্ট্ৰি

আন্তঃৰাষ্ট্ৰীয় অলিম্পিক সমিতিৰ সভাপতি হোৱাৰ বাবে কিৰ্ষ্টি কভেণ্ট্ৰিক অভিনন্দন জনাই আন্তঃৰাষ্ট্ৰীয় ক্ৰিকেট পৰিষদৰ সভাপতি জয় শ্বাহে কয় যে তেওঁ ২০২৮ চনৰ লছ এঞ্জেলছ অলিম্পিক গেমছত ক্ৰিকেটক অন্তৰ্ভুক্ত কৰিবলৈ প্ৰতিশ্ৰুতিবদ্ধ। ইয়াৰ বাবে তেওঁ আন্তঃৰাষ্ট্ৰীয় অলিম্পিক সমিতিৰ নৱনিৰ্বাচিত সভাপতি কিৰ্ষ্টি কভেণ্ট্ৰিৰ সৈতে কাম কৰিবলৈ আগ্ৰহী।

ইয়াৰ পূৰ্বে কমনৱেলথ গেমছ ২০২২ আৰু এছিয়ান গেমছ ২০২৩ত ক্ৰিকেট অন্তৰ্ভুক্ত কৰা হৈছিল। একে সময়তে এতিয়া ক্ৰিকেটক লছ এঞ্জেলছ অলিম্পিক গেমছ ২০২৮ত অন্তৰ্ভুক্ত কৰাৰ প্ৰস্তুতি চলি আছে। যদি এনেকুৱা হয় তেন্তে প্ৰায় ১২৮ বছৰৰ পাছত ক্ৰিকেট পুনৰ অলিম্পিক গেমছলৈ ঘূৰি আহিব।

উল্লেখ্য যে কিৰ্ষ্টি কভেণ্ট্ৰি আন্তঃৰাষ্ট্ৰীয় অলিম্পিক কমিটীৰ (আই অ’ চি) দশম সভাপতি হ’ব। ইয়াৰ উপৰিও আই অ’ চিৰ সভানেত্ৰী নিৰ্বাচিত হোৱা প্ৰথমগৰাকী মহিলা আৰু প্ৰথমগৰাকী আফ্ৰিকান হ’ব। গ্ৰীচৰ কোষ্টা নাভাৰিনোত অনুষ্ঠিত হোৱা আই অ’ চিৰ ১৪৪ সংখ্যক অধিবেশনত কিৰ্ষ্টি কভেণ্ট্ৰি সভানেত্ৰী হিচাপে নিৰ্বাচিত হয়। ইয়াৰ পূৰ্বে আইচিচি চেম্পিয়নছ ট্ৰফীৰ খেলখনৰ বাবে কিৰ্ষ্টি কভেণ্ট্ৰিক আমন্ত্ৰণ জনোৱা হৈছিল। ভাৰত-অষ্ট্ৰেলিয়া ছেমি ফাইনেলৰ সময়ত দেখা গৈছিল কিৰ্ষ্টি কভেণ্ট্ৰিক। অৱশ্যে যদি অলিম্পিক গেমছত ক্ৰিকেট পুনৰ উভতি আহে তেন্তে ইয়াক এক ডাঙৰ পদক্ষেপ বুলি গণ্য কৰা হ’ব। ক্ৰিকেটৰ উপৰিও বেছবল, ফ্লেগ ফুটবল, লেক্ৰছ আৰু স্কোয়াছ ২০২৮ চনৰ লছ এঞ্জেলছ অলিম্পিক গেমছত ঘূৰি অহাৰ সম্ভাৱনা আছে।