ৰিয়ানৰ ৬৪টা বলত অপৰাজিত ১৪৪ ৰান

ইতিমধ্যে গুৱাহাটী আৰু জয়পুৰত হোৱা ৰাজস্থান বয়েলছৰ অনুশীলনত অংশ লোৱা ৰিয়ানে কালি সৱাই মানসিং ষ্টেডিয়ামত খেলা এখন অনুশীলন মেচত এক বিস্ফোৰক ইনিংছ খেলি দলৰ শিবিৰলৈ আশাৰ বতৰা কঢ়িয়াই আনিছে। মেচখনত ৰিয়ানে মাত্র ৬৪টা বলৰ সন্মুখীন হৈ অপৰাজিত ১৪৪ ৰান কৰে। 

ৰিয়ানৰ বিস্ফোৰক শতকীয় ইনিংছত আছিল ১০টা ছিক্সাৰ আৰু ১৬টা বাউণ্ডেৰী। স্বাভাৱিকতে অসম সন্তানৰ এই ইনিংছে ৰাজস্থান ৰয়েলছৰ দলীয় মেনেজমেন্টক ৰিয়ানক লৈ নতুন ৰণনীতি প্রস্তুত কৰাৰ বাট মুকলি কৰে। উল্লেখযোগ্য যে 'এক দল, এক ভাষা। জন্ম ৰাজস্থানত, উদযাপন অসমত।' শ্ল'গানেৰে আসন্ন আই পি এলৰ প্ৰথম দুখন ঘৰুৱা মেচ গুৱাহাটীত খেলিব ৰাজস্থান ৰয়েলছে। আই পি এলৰ প্ৰথম বৰ্ষৰ চেম্পিয়ন ৰাজস্থান ৰয়েলছে অহা ২৬ মার্চত গুৱাহাটীত প্রথমখন ঘৰুৱা মেচত কলকাতা নাইট ৰাইডাৰ্ছৰ মুখামুখি হোৱাৰ বিপৰীতে ৩০ মার্চত ছিজনৰ দ্বিতীয়খন ঘৰুৱা মেচ দলটোৱে এ চি এ ষ্টেডিয়ামত চেন্নাই ছুপাৰ কিংছৰ বিৰুদ্ধে খেলিব। গুৱাহাটীৰ দুয়োখন মেচ নৈশালোকত অনুষ্ঠিত হ'ব। ইয়াৰ পূৰ্বে ৰাজস্থান ৰয়েলছ দলে হায়দৰাবাদত ছানৰাইজাৰ্ছৰ বিৰুদ্ধে অহা ২৩ মার্চত প্রথমখন মেচ খেলি নতুন ছিজনত অভিযান আৰম্ভ কৰিব। ৰিয়ানৰ বেটিঙৰ ওপৰতে ৰাজস্থান ৰয়েলছৰ চমকপ্রদ আৰম্ভণিও নিৰ্ভৰ কৰিব। কাৰণ গুৱাহাটী ৰিয়ানৰ গৃহভূমি। সেয়ে, দুই চেম্পিয়ন দল কলকাতা নাইট ৰাইডাৰ্ছ আৰু চেন্নাই ছুপাৰ কিংছক গুৱাহাটীত নিজৰ অনুৰাগীৰ সন্মুখত বিধ্বস্ত কৰিবলৈ দৃঢ়তাৰে সাজু হৈছে ৰিয়ান।

উৎসঃ দৈনিক জনমভূমি