কৰাচীত চেহৰীৰ সময়ত ভয়ংকৰ বিস্ফোৰণ: ৯টি শিশুকে ধৰি ১৬ জনৰ কৰুণ মৃত্যু

ডিজিটেল ডেস্কঃ পবিত্ৰ ৰমজান মাহৰ প্ৰথম দিনটোতে পাকিস্তানৰ কৰাচী চহৰত এক মৰ্মান্তিক দুৰ্ঘটনা সংঘটিত হৈছে।

বৃহস্পতিবাৰে পুৱতি নিশা 'চেহৰী'ৰ প্ৰস্তুতি চলাই থকাৰ সময়তে এটা অট্টালিকাত হোৱা শক্তিশালী বিস্ফোৰণত ১৬ জন লোকৰ থিতাতে মৃত্যু ঘটে। মৃতকৰ ভিতৰত ৯টি শিশু আৰু কেইবাগৰাকীও মহিলা আছে বুলি জানিব পৰা গৈছে।

আৰক্ষীৰ সূত্ৰ অনুসৰি, কৰাচীৰ 'অ'ল্ড চ'লজাৰ বজাৰ' অঞ্চলৰ এটা তিনিমহলীয়া অট্টালিকাৰ প্ৰথম মহলাত এই বিস্ফোৰণ সংঘটিত হয়। পুৱা প্ৰায় ৪:৩০ বজাত যেতিয়া পৰিয়ালটোৱে দিনটোৰ উপবাসৰ বাবে আহাৰ (চেহৰী) গ্ৰহণৰ প্ৰস্তুতি চলাই আছিল, তেতিয়াই হঠাতে এই শোকাৱহ ঘটনাটো ঘটে।

প্ৰাথমিক তদন্তত ধাৰণা কৰা হৈছে যে পাকঘৰৰ গেছ পাইপলাইন বা চিলিণ্ডাৰৰ পৰা নিৰ্গত হোৱা গেছৰ বাবেই এই বিস্ফোৰণ ঘটিছে। বিস্ফোৰণটো ইমান শক্তিশালী আছিল যে অট্টালিকাটোৰ এটা অংশ সম্পূৰ্ণৰূপে খহি পৰে আৰু ওচৰ-পাজৰৰ ঘৰসমূহৰো খিৰিকীৰ আইনা ভাঙি চূৰমাৰ হয়।

এই কৰুণ ঘটনাত পাকিস্তানৰ চৰকাৰে গভীৰ শোক প্ৰকাশ কৰিছে। সিন্ধ প্ৰদেশৰ মুখ্যমন্ত্ৰীয়ে সমগ্ৰ ঘটনাৰ তদন্তৰ নিৰ্দেশ দিয়াৰ লগতে আহতসকলক উন্নত চিকিৎসা প্ৰদান কৰিবলৈ কৰ্তৃপক্ষক নিৰ্দেশ দিছে। পবিত্ৰ উৎসৱৰ বতৰত এনে এক আকস্মিক দুৰ্ঘটনাই সমগ্ৰ পাকিস্তানতে শোকৰ ছাঁ পেলাইছে।