১ এপ্ৰিলৰ পৰা সলনি হ’ব ডিজিটেল লেনদেনৰ বহু নিয়ম: এতিয়া কেৱল OTP-য়েই নহয়,প্ৰয়োজন হ'ব এইকেইটা নথি...

ডিজিটেল ডেস্কঃ দেশৰ ডিজিটেল অৰ্থনীতিত সুৰক্ষা অধিক কটকটীয়া কৰাৰ উদ্দেশ্যে ভাৰতীয় ৰিজাৰ্ভ বেংকে এক গুৰুত্বপূৰ্ণ পদক্ষেপ গ্ৰহণ কৰিছে।

২০২৬ চনৰ ১ এপ্ৰিলৰ পৰা অনলাইন লেনদেনৰ ক্ষেত্ৰত নতুন নিয়ম কাৰ্যকৰী হ’বলৈ গৈ আছে। এতিয়াৰে পৰা যিকোনো ডিজিটেল পেমেণ্ট সম্পূৰ্ণ কৰিবলৈ গ্ৰাহকে টু-ফেক্টৰ অথেন্টিকেচন (2FA) প্ৰক্ৰিয়া অতিক্ৰম কৰিব লাগিব।

কেনেকৈ কাম কৰিব এই নতুন নিয়মে?

বৰ্তমান বেছিভাগ অনলাইন লেনদেন কেৱল এটা 'ৱান টাইম পাছৱৰ্ড' বা OTP-ৰ জৰিয়তে সম্পন্ন হয়। কিন্তু নতুন নিয়ম অনুসৰি, এতিয়া লেনদেনৰ বাবে অন্ততঃ টু-ফেক্টৰ অথেন্টিকেচন (2FA) প্ৰক্ৰিয়া প্ৰয়োজন হ’ব। ইয়াৰ ফলত কেৱল OTP চুৰি কৰি কোনোৱে আপোনাৰ একাউণ্টৰ পৰা ধন লুণ্ঠন কৰিব নোৱাৰিব।

প্ৰমাণীকৰণৰ বাবে ব্যৱহৃত হ’বলগীয়া পদ্ধতিসমূহ:

ব্যক্তিগত চিনাক্তকৰণ নম্বৰ (PIN): যিটো গ্ৰাহকে মনত ৰাখে।

বায়’মেট্ৰিক (Biometric): যেনে আঙুলিৰ ছাপ (Fingerprint) বা মুখমণ্ডলৰ চিনাক্তকৰণ (Face Recognition)।

ডিভাইচ বাইণ্ডিং টোকেন: বেংকিং এপত জেনেৰেট হোৱা বিশেষ ক’ড বা টোকেন।

SMS ভিত্তিক OTP: ম’বাইললৈ অহা মেছেজ।

কিয় লৈছে এই কঠোৰ সিদ্ধান্ত?

শেহতীয়া বছৰবোৰত অনলাইন প্ৰৱঞ্চনা আৰু চাইবাৰ অপৰাধৰ সংখ্যা আশংকাজনকভাৱে বৃদ্ধি পাইছে। বহু ক্ষেত্ৰত প্ৰৱঞ্চকসকলে গ্ৰাহকক প্ৰলোভন দি বা ভয় দেখুৱাই ম’বাইলৰ OTP সংগ্ৰহ কৰে আৰু মুহূৰ্তৰ ভিতৰতে একাউণ্ট খালী কৰি দিয়ে। এই নতুন ব্যৱস্থাই:

অননুমোদিত (Unauthorized) লেনদেনত বাধা দিব।

ফিশ্বিং আৰু চিম কাৰ্ড স্কেমৰ পৰা সুৰক্ষা প্ৰদান কৰিব।

ডিজিটেল লেনদেনৰ প্ৰতি গ্ৰাহকৰ আস্থা বৃদ্ধি কৰিব।

এই একেই টু-ফেক্টৰ অথেন্টিকেচন নিয়ম ২০২৬ চনৰ ১ অক্টোবৰৰ পৰা আন্তঃৰাষ্ট্ৰীয় কাৰ্ড লেনদেনৰ ক্ষেত্ৰতো বাধ্যতামূলক কৰা হ’ব।

১ এপ্ৰিলৰ পৰা আপোনাৰ বেংকিং এপসমূহ আপডেট কৰি ৰাখক আৰু নিজৰ বায়’মেট্ৰিক বা PIN সঠিকভাৱে ঠিক কৰি লওক। যদিও এই প্ৰক্ৰিয়াটোত অলপ অধিক সময় লাগিব পাৰে, তথাপিও ই আপোনাৰ কষ্টোপাৰ্জিত ধনৰ নিৰাপত্তা সুনিশ্চিত কৰিব।