ডিজিটেল ডেস্কঃ হলিউডৰ আটাইতকৈ মৰ্যাদাপূৰ্ণ ৯৮ সংখ্যক অকাডেমী বঁটা অনুষ্ঠানত পুনৰ এবাৰ ভাৰতীয় গৌৰৱ প্ৰতিষ্ঠা কৰিলে অভিনেত্ৰী প্ৰিয়ংকা চোপ্ৰাই।
লছ এঞ্জেলছৰ ডলবি থিয়েটাৰত আয়োজিত এই ভব্য অনুষ্ঠানত প্ৰিয়ংকাই কেৱল এগৰাকী অতিথি হিচাপেই নহয়, বৰঞ্চ এগৰাকী 'বঁটা প্ৰদানকাৰী হিচাপে অংশগ্ৰহণ কৰি বিশ্ববাসীৰ দৃষ্টি আকৰ্ষণ কৰে।
ৰেড কাৰ্পেটত প্ৰিয়ংকাক স্বামী তথা জনপ্ৰিয় পপ গায়ক নিক জোনাছৰ সৈতে দেখা যায়।প্ৰিয়ংকাই এই বিশেষ দিনটোৰ বাবে বিশ্ববিখ্যাত ব্ৰেণ্ড ডিয়ৰ (Dior)-ৰ এটা ষ্ট্ৰেপলেছ বগা গাউন নিৰ্বাচন কৰিছিল। গাউনটোৰ তলৰ ফালে থকা দীঘল ফ্লোয়িং ডিজাইন আৰু হাই-স্লিটে তেওঁক এক গ্লেমাৰাছ তথা ৰাজকীয় ৰূপ প্ৰদান কৰিছিল।
আনহাতে, নিক জোনাছে এটা ক্লাছিক ব্লেক ভেলভেট টাক্সিডো আৰু ব’ টাই পৰিধান কৰি পত্নীৰ বগা সাজযোৰৰ সৈতে এক নিখুঁত সামঞ্জস্য ৰক্ষা কৰে।
গুৰুত্বপূৰ্ণ দায়িত্বত প্ৰিয়ংকা
এইবাৰ অস্কাৰৰ মঞ্চত প্ৰিয়ংকাক এক গুৰুত্বপূৰ্ণ ভূমিকাত দেখা পোৱা যায়। তেওঁ বিখ্যাত স্পেনিছ অভিনেতা জেভিয়াৰ বাৰ্ডেমৰ সৈতে মঞ্চত উপস্থিত হৈ 'শ্ৰেষ্ঠ আন্তঃৰাষ্ট্ৰীয় ফিচাৰ ফিল্ম' (Best International Feature Film) শিতানৰ বিজয়ীৰ নাম ঘোষণা কৰে। আন্তঃৰাষ্ট্ৰীয় মঞ্চত ভাৰতীয় শিল্পীৰ এনে বলিষ্ঠ উপস্থিতিয়ে ভাৰতীয় চিনেমাৰ ক্ৰমবৰ্ধমান প্ৰভাৱক প্ৰতিফলিত কৰিছে।
ছচিয়েল মিডিয়াত ভাইৰেল মুহূৰ্ত
অনুষ্ঠানৰ পূৰ্বে প্ৰিয়ংকাই তেওঁৰ ইনষ্টাগ্ৰামযোগে প্ৰস্তুতিৰ কিছু 'বিহাইণ্ড দ্য চিন' দৃশ্য শ্বেয়াৰ কৰিছিল। ড্ৰেছিং ৰুমত তেওঁৰ মেকআপ টিমৰ ব্যস্ততাৰ পৰা আৰম্ভ কৰি তেওঁৰ সাজ-সজ্জাৰ সূক্ষ্ম কাৰুকাৰ্যলৈকে সকলোবোৰ অনুৰাগীৰ বাবে উৎসুকতাৰ কাৰণ হৈ পৰে।
ভৱিষ্যতৰ পৰিকল্পনা
কেৱল আন্তঃৰাষ্ট্ৰীয় মঞ্চই নহয়, ভাৰতীয় চিনেমাটো প্ৰিয়ংকাই এক ধামাকাৰ সৈতে উভতি অহাৰ প্ৰস্তুতি চলাইছে। অতি সোনকালেই তেওঁক এছ. এছ. ৰাজামৌলীৰ বহুচৰ্চিত ছবি 'বাৰাণসী'-ত দেখা পোৱা যাব। এই ছবিত তেওঁ প্ৰথমবাৰৰ বাবে দক্ষিণৰ চুপাৰষ্টাৰ মহেশ বাবুৰ বিপৰীতে অভিনয় কৰিব। প্ৰায় সাত বছৰৰ বিৰতিৰ পিছত প্ৰিয়ংকাৰ ভাৰতীয় পৰ্দালৈ এই প্ৰত্যাৱৰ্তনক লৈ দেশজুৰি তীব্ৰ উছাহৰ সৃষ্টি হৈছে।
Continue Reading
