ডিজিটেল ডেস্ক: মাহজোৰা ত্যাগ, সংযম আৰু ৰোজাৰ অন্তত আজি ইছলাম ধৰ্মাৱলম্বী লোকসকলে উদযাপন কৰিছে ঈদ। দেশজুৰি ইছলামধৰ্মী লোকসকলে পালন কৰিছে ঈদ ৷ আকাশত ঈদৰ জোন প্ৰত্যক্ষ হোৱাৰ পাছতেই দেশৰ লগতে অসমৰো প্ৰান্তে প্ৰান্তে দেখা গৈছে প্ৰেম–ভাতৃত্ববোধৰ ছবি।
কেৱল ভাৰতবাসীয়েই নহয় বিশ্বৰ প্ৰতিজন ইছলাম ধৰ্মৰ লোকে এই উৎসৱৰ আগমনৰ লগ লগেই ত্যাগ আৰু ভাতৃত্ববোধৰ বাণী বিলাই উদযাপন কৰে পৱিত্ৰ ঈদ-উল-ফিতৰ । ভ্ৰাতৃত্ববোধ আৰু ঐক্যৰ নিদৰ্শন দাঙি ধৰা এই উৎসৱ সমগ্ৰ দেশৰ মুছলমান ভাই-ভনীসকলে অতি উৎসাহ আৰু আনন্দেৰে উদযাপন কৰে।
পৱিত্ৰ ঈদ উপলক্ষে আজি পুৱা দেশৰ বিভিন্ন প্ৰান্তত ইছলামধৰ্মী লোকসকল একত্ৰিত হৈ ঈদৰ নামাজ আদায় কৰাৰ লগতে ইজনে আনজনক ঈদৰ শুভেচ্ছা জ্ঞাপন কৰাটো পৰিলক্ষিত হয় ৷ ঈদক লৈ ইছলাম ধৰ্মাৱলম্বী লোকসকলৰ মাজত দেখা গৈছে উখল-মাখল পৰিৱেশ।
আনহাতে ঈদ উপলক্ষে বজাৰসমূহত উপলব্ধ হৈছে বিভিন্ন সুস্বাদু মিঠাই। লগতে ইছলামধৰ্মীসকলে পৰিধান কৰিছে নতুন সাজ-পোছাক। এক কথাত ক’বলৈ গ’লে দৰিদ্ৰ আৰু নিঃস্বসকলক সহায় কৰাৰ লগতে তেওঁলোকৰ সৈতে সুখৰ ভাগ-বতৰা কৰাৰ এক সুযোগ ঈদ। এই উৎসৱে আমাক শান্তিপূৰ্ণ জীৱন যাপন কৰিবলৈ আৰু সমাজৰ সমৃদ্ধি আৰু সমৃদ্ধিৰ বাবে কাম কৰিবলৈ অনুপ্ৰাণিত কৰে।
উৎস- দৈনিক জনমভূমি
Continue Reading
